Psonm 101 - Labib An Kreol Seselwa

Promes En Lerwa

En psonm David.

¹ Mon pou sant ou fidelite ek ou lazistis. Mon pou sant pour ou SENYER.

² Mon pou kondwir mwan byen. Kan eski ou pou vin kot mwan? Dan mon lakour, mon pou anmenn en lavi drwat e san repros.

³ Mon pa pou get nanryen ki napa valer. Mon pou deteste fason fer bann ki egare. Zot pa pou annan nanryen pour fer avek mwan.

⁴ Mon pa pou frekant dimoun malonnet; mon pa pou annan nanryen pour fer avek lemal.

⁵ Mon pou detri sa enn ki kalonmni son prosen dan kasyet. Mon pa pou toler bann ki orgeye e arogan.

⁶ Mon pou swazir dimoun sir dan pei. Zot pou asosye avek mwan. Sa enn ki kondwir li byen ava kapab servi mwan.

⁷ Sa enn ki tronp dimoun pa pou reste dan mon lakaz. Napa plas dan mon lakaz pour sa enn ki tronp son prosen. Bann manter pa pou kontinyen reste dan mon prezans.

⁸ Tou le bomaten, mon pou detri bann malfeter dan pei; mon pou elimin tou malfeter dan lavil SENYER.