Psonm 10 - Labib An Kreol Seselwa

Lapriyer pour Demann Lazistis

¹ SENYER! Akoz ou reste lwen avek mwan? Akoz ou kasyet ou kan mon dan maler?

² Bann malfeter pa onte pour eksplwat bann pov e fer soufer bann malere. Zot in ganny pri dan zot prop latrap.

³ I vant son lekor akoz son bann move dezir. Akoz in reisi, i gognard SENYER e mepriz li.

⁴ Dan son larogans, i dir: Bondye pa pini. Dan son lespri i mazinen: Bondye pa pou fer nanryen.

⁵ I touzour reisi dan tou sa ki i antreprann. Zizman Bondye pa afekte li. I kraz son bann lennmi.

⁶ I dir dan li menm: Zanmen mon pou perdi; zanmen mon pou tonm dan maler.

⁷ Zis malediksyon, mansonz ek vyolans ki sorti dan son labous. Anba son lalang i annan zis forfe ek mesanste.

⁸ I madre pour atake dan bann vilaz e touy bann dimoun inosan. I vey bann ki san defans.

⁹ Parey en lyon, i kasyet an sekre dan brousay. I espere pour li atrap en malere. Kan in atrap li, i trenn li dan son latrap.

¹⁰ Sa enn ki san sipor i ganny ansonmen, kraze. I tonm anba pouvwar bann malfeter.

¹¹ I dir dan li menm: Bondye in oubliye; in kasyet son figir, i pa pou zanmen war nanryen.

¹² Leve SENYER! Mon Bondye! Lev ou lanmen. Pa oubliy bann malere!

¹³ Akoz bann malfeter pa antren Bondye? Akoz zot dir dan zot leker: Bondye pa pou demann mwan rann kont?

¹⁴ Me ou war tou sa ki pe pase: Ou war zot soufrans ek zot lapenn. Ou fer sir ki tou i dan ou lanmen. Malere i met son konfyans dan ou e se ou ki vin osekour bann orfelen.

¹⁵ Kas lebra bann malfeter. Fer zot pey pour tou zot bann move aksyon, ziska ki zot disparet devan ou.

¹⁶ SENYER i lerwa pour touzour. Bann nasyon pou disparet dan son pei.

¹⁷ SENYER! Ou ekout lapriyer bann dimoun ki annan limilite. Ou pou redonn zot kouraz, e ekout zot,

¹⁸ pour ou etabli lazistis an faver bann orfelen ek sa enn ki ganny kraze. Konmsa, personn lo later pa pou kapab senm lafreyer ankor.