Psonm 1 - Labib An Kreol Seselwa

Vre Boner

¹ Byennere sa enn ki pa ekout konsey bann malfeter, ki pa swiv legzanp dimoun ki fer sa ki mal, ki pa asiz parmi bann dimoun moker!

² O kontrer, i pran plezir dan lalwa SENYER e medit lo son komannman, lizour koman aswar.

³ I parey en pye dibwa ki'n ganny plante obor larivyer, ki raport fri dan son sezon; son fey i reste touzour ver. I reisi dan tou sa ki i antreprann.

⁴ I pa parey bann malfeter: Zot koman lapay ki voltize dan divan.

⁵ Pour sa rezon, bann malfeter pa pou tenir debout dan zizman, ni bann peser dan lasanble bann zis.

⁶ Annefe, SENYER i protez semen bann ki zis. Me bann malfeter i pran semen ki anmenn dan perdisyon.