Proverb 8 - Labib An Kreol Seselwa

An Loner Lasazes

¹ Ekoute! Lasazes pe apele. Rezonnman pe fer tande son lavwa.

² Lo bann kolin, obor semen, dan krwaze semen, lasazes in pran pozisyon.

³ I ti kriy for, akote bann laport devan lavil, devan lantre bann lakaz:

⁴ Imen! Avek ou, ki mon pe kriye. Mon lapel i adres tou dimoun ki lo later:

⁵ Zot bann fou! Ganny lespri dan zot latet. Zot ki'n perdi rezon! Aprann rezonnen.

⁶ Ekoute! Mon annan keksoz enportan pour dir, e mon labous ava proklanm sa ki drwat.

⁷ Annefe, mon labous pou dir laverite; mansonz napa plas dan mon labous.

⁸ Tou sa ki mon dir i egzakt. Zanmen mon koz pour tronpe; mon pa pe koz manti.

⁹ Sa enn ki annan lespri i konpran mon bann parol; pour sa enn ki annan konnesans, mon parol i drwat.

¹⁰ Swazir mon lansennyman plito ki larzan e konnesans dan plas lor pir.

¹¹ Annefe, lasazes i meyer ki bann bizou; i pli presye ki tou sa ki ou kapab anvi.

Bann Tit Lasazes

¹² Mwan lasazes, mon viv avek pridans; mon dekouver konnesans avek refleksyon.

¹³ Ler ou annan respe anver SENYER, ou deteste sa ki mal. Mon deteste lorgey ek larogans, movez aksyon ek mansonz.

¹⁴ Mon donn bon konsey ek bon rezonnman. Mon annan bon rezonnman, mon annan lafors.

¹⁵ Gras a mwan, bann lerwa i rennyen e bann sef i fer bann bon lalwa.

¹⁶ Gras a mwan, bann dirizan, ensi ki bann ziz bann sef i gouvernen.

¹⁷ Mon kontan dimoun ki kontan mwan. Sa bann ki vreman rod mwan i kapab trouv mwan.

¹⁸ Mon posed larises ek loner, bann byen dirab ek lazistis.

¹⁹ Mon fri i meyer ki lor, menm lor pir, e fri ki mon raporte i vo plis ki larzan pir.

²⁰ Mon mars lo semen lazistis, tou dilon bann santye laverite,

²¹ pour donn en posesyon bann dimoun ki kontan mwan, pour ranpli zot kof.

Lorizin Lasazes

²² SENYER in kree mwan an premye, avan tou sa ki i'n fer depi tre lontan.

²³ In etabli mwan depi touzour, depi konmansman, avan ki later ti ganny kree.

²⁴ Mon'n ganny met omonn avan bann losean, ler ti napa okenn larivyer avek bokou delo.

²⁵ Mon ti ganny met omonn avan ki bann montanny ek bann kolin ti ganny met anplas.

²⁶ I pa ti ankor kree ni later ni lakanpanny, ni premye gren lapousyer lo later.

²⁷ Mon ti la, kan i ti fikse lesyel; kan i ti tras en serk lo lafas lanmer.

²⁸ I ti plas bann nyaz par lao e donn lafors bann delo par anba.

²⁹ I ti fikse lanmer son bann limit pour ki bann delo pa deborde; e i ti mark bann fondasyon later.

³⁰ Pandan sa letan mon ti akote li, parey en arsitek. Mon ti fer li toultan plezir; mon ti toultan zwe dan son prezans

³¹ dan son liniver, avek son later. Mon ti ganny bokou lazwa parmi bann imen.

Boner pour bann ki Ekout Lasazes

³² Aprezan, mon bann zanfan! Ekout mwan. Byennere sa bann ki swiv mon semen.

³³ Ekout mon bann konsey! Pa les zot de kote e zot ava ganny lasazes.

³⁴ Byennere sa enn ki ekout mwan! Byennere sa enn ki vey tou le zour kot mwan, e ki sirvey lantre mon lakaz.

³⁵ Sa enn ki trouv mwan in trouv lavi e i dan faver SENYER.

³⁶ Me dimoun ki ofans mwan, i fer son prop lekor ditor. Dimoun ki ay mwan, zot kontan lanmor.