Proverb 5 - Labib An Kreol Seselwa

Lavertisman kont Lenpirte ek Lenfidelite

¹ Mon garson! Pret latansyon mon bann parol lasazes e ekout mon rezonnman.

² Alor, ou ava byen reflesir e ou labous ava konserv konnesans.

³ Annefe, labous en fanm adilter i distil dimyel; son mannyer koze i pli dou ki delwil.

⁴ Me answit, i vin anmer parey labsent, fite parey en lepe lo son de kote.

⁵ Son lipye i desann dan rwayonm lanmor; son lepa i swiv santye ki anmenn dan latonm.

⁶ I pa mars drwat lo semen lavi, i perdi son semen san ki i konnen.

⁷ Aprezan, mon garson! Ekout mwan. Pa rezet mon bann konsey.

⁸ Reste lwen avek sa kalite fanm. Pa apros laport son lakaz,

⁹ sankwa, ou pou perdi ou loner avek lezot dimoun, e ou lavi avek dimoun kriyel.

¹⁰ Bann etranze ava profit lo ou larises; prodwi ou travay ava al pour en lot fanmir.

¹¹ Alafen ou lavi, ou pou plennyen ler ou laser ek ou lekor in fatige.

¹² Alor, ou ava dir: Mon'n deteste disiplin, mon leker in mepriz bann konsey,

¹³ mon pa'n ekout lavwa mon bann met, ni port atansyon lo zot bann lansennyman.

¹⁴ Aprezan, mon obor larin dan milye lasanble ek lakominote.

Lanmour pour Son Fanm

¹⁵ Bwar delo ki sorti dan ou prop sitern, e delo ki ou tire dan ou pwi.

¹⁶ Ou sours pa devre koul dan bann plas piblik, oubyen dan bann lari.

¹⁷ Fer zot koul zis pour ou e pa partaz avek bann etranze.

¹⁸ Ou sours ava ganny beni e ava trouv lazwa fanm ou lazenes,

¹⁹ ki parey en zoli kabri, en zanti gazel. Les son tete soul ou toultan; les li fer ou vin fou avek son lanmour.

²⁰ Mon garson! Akoz ou al rod plezir avek fanm en lot e kares tete en fanm ki ou pa konnen?

²¹ Annefe, SENYER i war tou sa ki zonm i fer; i egzamin tou zot aksyon.

²² Malfeter i ganny pri dan son prop latrap. Lasenn son pese i anpay li.

²³ I mor akoz i pa'n ganny elve. I perdi dan son gran lafoli.