Proverb 4 - Labib An Kreol Seselwa

Konsey pour bann Paran

¹ Zanfan! Ekout konsey en papa. Pret atansyon e zot ava ganny disernman.

² Akoz mon pe donn zot bann bon leson, alor, pa abandonn mon lansennyman.

³ Mwan osi, mon ti en garson pour mon papa; mon ti zanfan prefere mon manman.

⁴ Mon papa ti ansenny mwan; i ti dir mwan: Gard mon bann parol lo ou leker; obzerv mon bann komannman e ou ava viv.

⁵ Rod lasazes, rod disernman; pa oubliye, ni elwanny ou avek bann parol ki sorti dan mon labous.

⁶ Pa abandonn lasazes e lasazes ava protez ou; kontan li e i ava vey lo ou.

⁷ Pour vin en saz, konmans par ganny lasazes. Donn tou sa ki ou posede pour ou ganny disernman.

⁸ Ser lasazes dan ou lebra e i ava fer ou vin enportan; i ava onor ou si ou ser li for kont ou.

⁹ I ava poz en zoli girlann lo ou latet; i ava orn ou latet avek en zoli kouronn.

Lasazes I Donn Lavi

¹⁰ Mon zanfan! Ekoute. Aksepte mon bann parol e ou ava viv lontan.

¹¹ Mon'n ansenny ou semen lasazes. Mon'n kondwir ou lo bann santye ladrwatir.

¹² Ler ou pou marse, personn pa pou zenn ou; si ou taye, ou pa pou tonbe.

¹³ Gard lenstriksyon ki ou'n gannyen, pa abandonn li; gard li, akoz i ou lavi.

¹⁴ Pa antre dan semen bann ki pratik lemal, pa pran semen bann malfeter.

¹⁵ Evite frekant li. Les li e kontiny ou semen.

¹⁶ Bann malfeter pa pou dormi, si zot pa'n fer sa ki mal. Zot perdi sonmey, si zot pa fer personn tonbe.

¹⁷ Annefe, zot viv lo mesanste e zot bwar diven lavyolans.

¹⁸ Me semen sa enn ki zis i parey lalimyer granmaten ki vin deplizanpli for ziska midi.

¹⁹ Semen bann malfeter i parey gro fernwanr; zot pa konnen kwa ki fer zot tonbe.

Swazir bann Semen Sir

²⁰ Mon garson! Ekout mon bann parol; Ekout byen mon bann konsey.

²¹ Pa les zot sorti devan ou lizye; gard zot dan fon ou leker.

²² Zot donn lavi ek lasante sa enn ki dekouver zot.

²³ Sirtou, vey lo ou leker, akoz i sours lavi.

²⁴ Pa les mansonz sorti dan ou labous; pa fer okenn medizans.

²⁵ Get dimoun anfas, regard drwat devan ou.

²⁶ Fer semen nivo kot ou pase e tou ou bann semen ava sir.

²⁷ Pa detourn ni adrwat ni agos; elwanny ou lipye devan sa ki mal.