Proverb 30 - Labib An Kreol Seselwa

Parol Agour

¹ Parol sorti kot Agour, garson Yake. La sa ki sa zonm ti deklare avek Ityel ek Oukal:

² I vre ki mon pli bet ki nenport ki zonm; mon napa disernman imen.

³ Mon pa'n aprann lasazes, mon napa konnesans bann sen.

⁴ Lekel ki'n mont dan lesyel e ki'n desann? Lekel ki'n atrap divan dan kre son lanmen? Lekel ki'n anvlop delo dan son lenz? Lekel ki'n plas bann limit later? Ki mannyer i apele? Koman son garson i apele? Si ou konnen, dir mwan.

⁵ Tou bann Parol Bondye in ganny teste. I en boukliye pour sa enn ki pran refiz kot li.

⁶ Pa azout nanryen avek sa bann parol sankwa ou pou ganny reprose e ou ava pas pour en manter.

⁷ Mon demann ou de keksoz; pa refiz mwan avan ki mon mor:

⁸ Elwanny avek mwan sa ki fo ek parol mansonz; pa donn mwan ni lanmizer, ni larises; me donn mwan zis sa ki neseser pour viv.

⁹ Annefe, si mon vin tro ris, mon riske trai ou e dir: Lekel li SENYER? E si mon vin tro pov, mon kapab vin en voler. Alor, mon pou nepli annan respe pour non Bondye.

¹⁰ Pa dir dimal en serviter devan son met; i riske modi ou e fer ou pey pour ou fot.

¹¹ I annan en kalite dimoun ki modi zot papa e pa beni zot manman.

¹² I annan en bann ki krwar zot pir, me ki pa'n lav zot salte.

¹³ I annan ki orgeye e ki get ou avek mepri.

¹⁴ Serten i annan ledan parey lepe, e lanmaswar parey kouto pour devore e fer disparet bann pov lo later, ek bann dezerite parmi bann et imen.

¹⁵ Sise i annan de fiy ki dir: Donnen! Donnen! I annan trwa keksoz ki pa zanmen satisfe, kat ki pa zanmen dir: Ase!

¹⁶ Lemonn lanmor, en fanm steril, en later kot napa delo, e dife ki zanmen i dir: Ase!

¹⁷ Lizye ki mepriz en papa, e ki negliz obeir son manman, korbo obor larivyer, pour krev zot, piti en leg pour devor zot.

¹⁸ I annan trwa keksoz ki etonn mwan e ki mon pa konpran, e kat ki mon pa konnen:

¹⁹ Latras leg dan lesyel, latras serpan lo en ros, latras bato dan milye lanmer e latras zonm kot en zenn fiy.

²⁰ La koman en fanm adilter i konport li: I manze, eswiy son labous, e dir: Mon pa'n fer nanryen mal.

²¹ Trwa keksoz i fer tranble later; i annan kat ki i pa kapab siporte:

²² En lesklav ki vin lerwa, en fou rasazye avek dipen,

²³ en fanm deteste ki marye, e en servant ki ranplas son metres.

²⁴ I annan kat keksoz ki tipti lo later me zot vreman entelizan;

²⁵ bann fourmi ki napa lafors, me ki prepar zot nouritir pandan lete;

²⁶ bann daman ki napa pouvwar ki viv dan bann kap ros,

²⁷ bann krike ki napa lerwa, me ki sorti par group;

²⁸ bann lezar ki kapab ganny atrape avek lanmen, e ki antre dan pale bann lerwa.

²⁹ I annan trwa keksoz ki mars avek lafyerte, kat ki annan en zoli demars:

³⁰ En lyon ki pli for parmi bann zannimo, ki pa kile devan personn;

³¹ en kok ki drese lo son bann zergo, oubyen en bouk ek lerwa dan milye son larme.

³² Apre ki ou'n ase fou pour vant ou lekor, ou'n reflesi, met ou lanmen lo labous:

³³ Ler ou bat dile, ou ganny diber, tap lo nennen i fer sorti disan, e met ankoler i prodwi bagar.