Proverb 3 - Labib An Kreol Seselwa

Lasazes ek Respe pour Bondye

¹ Mon garson! Pa oubliy mon lansennyman; gard mon bann komannman dan ou leker.

² Zot ava fer ou viv pli lontan e ou ava ere.

³ Reste touzour bon e fidel. Atas sa bann kalite otour ou likou; ekri zot lo lardwaz ou leker.

⁴ Konmsa, Bondye ek zonm ava kontan ou.

⁵ Met ou konfyans dan SENYER avek tou ou leker; pa kont lo ou prop rezonnman.

⁶ Rekonnet li dan tou sa ki ou antreprann e i ava gid ou lo ou semen.

⁷ Pa krwar ou tro saz; annan respe pour SENYER e elwanny avek sa ki mal.

⁸ Sa i ava en remed pour ou lekor e i ava kalme ou douler.

⁹ Rann glwar SENYER avek sa ki ou annan, e avek premye fri tou ou bann rekolt.

¹⁰ Alor, ou bann grennyen ava ranpli avek prodwi ou rekolt e ou bann barik pou deborde avek diven.

¹¹ Mon garson! Pa rezet bann konsey SENYER, ni mepriz son bann lavertisman.

¹² Annefe, SENYER i koriz sa enn ki i kontan, parey en papa i fer anver son zanfan ki i prefere.

Lasazes I Rann Ere

¹³ I byennere sa enn ki'n trouv lasazes, sa enn ki'n ganny disernman,

¹⁴ akoz lasazes i raport plis ki larzan e i donn plis ki lor.

¹⁵ I pli presye ki okenn perl; napa nanryen pli dezirab ki li.

¹⁶ Lavi long i dan son lanmen drwat; larises ek loner i dan son lanmen gos.

¹⁷ I fer plezir mars lo son semen; tou son bann santye i kondwir ver prosperite.

¹⁸ Pour sa enn ki sezi li, lasazes i en pye dibwa ki donn lavi; sa enn ki gard li byen, i ganny deklare byennere.

Lasazes Bondye dan Lakreasyon

¹⁹ SENYER ti poz fondasyon later avek son lasazes; lesyel ti ganny etabli par son konnesans.

²⁰ Par son konnesans, bann rezervwar ki anba later dan lanmer, ti ouver e bann nyaz ti fer tonbe lapli.

Proteksyon Bondye pour bann Saz

²¹ Mon garson! Gard ou lizye fikse lo lasazes ek refleksyon.

²² Zot ava lavi pour ou et antye e en ornman pour ou likou.

²³ Alor, ou ava kontiny ou semen an sekirite e ou lipye pa pou glise.

²⁴ Si ou al alonze, ou pa pou trakase; aswar, ou ava dormi anpe.

²⁵ Lafreyer pa pou tonm lo ou sibitman e malfeter pa pou atak ou,

²⁶ akoz SENYER pou protez ou. I pa pou les ou lipye tonm dan en latrap.

Lanmour pour Son Prosen

²⁷ Sak fwa ki ou kapab, pa refize fer dibyen sa enn ki dan bezwen.

²⁸ Pa dir ou prosen: Ale! Retournen; demen mon ava donn ou, alor ki ou annan dekwa pour donnen.

²⁹ Pa fer konplo kont ou vwazen alor ki i pe viv pre kot ou avek konfyans.

³⁰ Pa dispit avek dimoun san okenn rezon, alor ki i pa'n fer ou okenn ditor.

³¹ Pa anvye en dimoun vyolan, ni swiv okenn son bann mannyer fer,

³² akoz SENYER i deteste sa enn ki fourb; me i partaz son bann sekre avek sa enn ki drwat.

³³ Malediksyon SENYER i tonm lo lafanmir en malfeter, me SENYER i beni lafanmir sa enn ki zis.

³⁴ SENYER pa pran ka dimoun ensolan; me i bon anver dimoun senp.

³⁵ Sa enn ki saz ava erit loner, sa enn ki bet ava erit laont.