Proverb 28 - Labib An Kreol Seselwa

¹ En malfeter i sove san ki personn pa pourswiv li; me sa enn ki zis i annan otan konfyans ki en lyon.

² Ler i annan bokou dirizan, en pei i revolte, me avek en sef ki annan disernman, lord i rennyen.

³ En diktater ki oprim bann malere, i parey en gro lapli ki pa les nanryen pou manze apre.

⁴ Sa enn ki abandonn lalwa, i fer loner bann malfeter; Me sa enn ki obzerv lalwa i konbat kont bann malfeter.

⁵ Malfeter pa konpran lazistis; me sa enn ki rod SENYER i konpran tou.

⁶ Vomye en pov ki viv onnetman, ki sa enn, menm si i ris, i annan movez kondwit.

⁷ Sa enn ki obzerv lalwa i en garson bon rezonnman. Me sa enn ki annan bann move frekantasyon, i fer laont son paran.

⁸ Si en dimoun i vin ris, par pret larzan avek gro lentere, son larises pou al pour sa enn ki bon anver bann pov.

⁹ Sa enn ki bous son zorey pour li pa antann sa ki lalwa i dir, menm son lapriyer i donn degou.

¹⁰ Sa enn ki antrenn en dimoun drwat lo move semen, pour tonm dan trou ki i'n fouye. Me dimoun ki drwat pou ere.

¹¹ Sa enn ki ris i krwar i saz; me en pov ki annan disernman i kapab demaske li.

¹² I en gran loner kan sa enn ki zis i triyonfe; me kan en malfeter i reisi, tou dimoun i al kasyet.

¹³ Sa enn ki kasyet son bann fot pa pou prospere. Me sa enn ki avoue son fot e renonse, pour ganny pardonnen.

¹⁴ Sa enn ki touzour veye pour pa fer sa ki mal fer, i ere. Me sa enn ki annan leker dir pour konn maler.

¹⁵ En dirizan dominer ki gouvern en pep pov, i parey en lyon ler i gronnyen, oubyen en lours ler i atake.

¹⁶ En sef san rezonnman i vin en gran diktater; sa enn ki deteste byen malaki ava viv lontan.

¹⁷ Sa enn ki annan disan lo son lanmen, pou sove pour tou son lavi.

¹⁸ Sa enn ki viv onnetman ava viv an sekirite; me sa enn ki anmenn en lavi doub, pou tonm dan enn bann latrap.

¹⁹ Sa enn ki kiltiv later, pa pou mank dipen; me sa enn ki kiltiv bann rev, pou reste touzour pov.

²⁰ Sa enn ki fidel pou ganny bokou benediksyon; me sa enn ki prese pour vin ris, pou ganny pini en zour.

²¹ I pa bon fer preferans ant dimoun; sepandan, pour en morso dipen, serten i kapab enzis.

²² En dimoun avar i prese pour li vin ris; i pa konnen ki lanmizer pour tap li.

²³ Avek letan, nou prefer sa enn ki kritike, plito ki sa enn ki flate.

²⁴ Sa enn ki depouy son papa ek son manman e ki dir: Sa pa en krim, i dalon avek en kaser lakaz.

²⁵ En dimoun arogan i provok bann dispit; me sa enn ki fer konfyans dan SENYER pour vin ris.

²⁶ Sa enn ki fer konfyans dan son prop zizman, i en fou; Me sa enn ki les li kondwir par lasazes, ava ganny delivre dan danze.

²⁷ Sa enn ki donn bann pov pa pou mank nanryen. Me sa enn ki ferm son lizye, pou konn bokou malediksyon.

²⁸ Kan en malfeter i pran pouvwar, tou dimoun i al kasyet. Ler i mor, bokou dimoun zis i leve.