Proverb 27 - Labib An Kreol Seselwa

¹ Pa fer vantar lo koman demen pour ete; akoz ou pa konnen sa ki kapab arive ozordi.

² Les lezot dimoun felisit ou, les en etranze fer li, me pa ou.

³ Ros i lour, disab i pez en kantite; me lakoler en fou i pli lour ki tou le de ansanm.

⁴ Lavyolans i kriyel, lakoler i parey en larivyer ki deborde; me lekel ki kapab tenir devan zalouzi?

⁵ Vomye en kritik fran ki en lanmour ki reste sekre.

⁶ Repros en zanmi i prouv son konfyans; en lennmi ki anbras ou i tronper.

⁷ En zonm ki pa lafen i refiz menm dimyel; pour sa enn ki anfanmen, sa ki anmer i dou.

⁸ En eran lwen avek son pei, i parey en zwazo ki pe anvole lwen avek son nik.

⁹ Delwil ek lansan i fer plezir leker; ladouser lanmitye i vo plis ki ou prop konsey.

¹⁰ Pa abandonn ou zanmi, ni zanmi ou papa. Si ou dan problenm, pa al kot ou frer. Annefe, en pros vwazen i preferab ki en paran lwen.

¹¹ Mon garson! Kondwir ou byen e rann mon leker ere; konmsa, mon ava kapab reponn sa enn ki fer mwan ditor.

¹² Ler maler pe vini, sa enn ki pridan i al kasyet; bann inyoran i tanpi, me zot pey ser.

¹³ Pran lenz sa enn ki'n port li garan pour det en etranze; demann en gaz avek sa enn ki port li kosyon pour en etranze.

¹⁴ En bonzour for granmaten; sa i parey en malediksyon.

¹⁵ En fanm ki dispit, i parey en dalo ki pa aret koule zour lapli.

¹⁶ Sa enn ki esey aret li, pe esey aret divan, oubyen i pe atrap delwil avek son lanmen drwat.

¹⁷ Feray i fit feray, en dimoun i egey vizaz son prosen.

¹⁸ Sa enn ki pran swen avek en pye fig, i manz son fri; sa enn ki pran swen avek son met, i ganny onore.

¹⁹ Parey ou prop vizaz i reflekte dan delo; leker imen i reflekte ou prop santiman.

²⁰ Parey ki lemonn lanmor ek lemonn bann defen pa zanmen rasazye, lizye zonm osi pa zanmen satisfe.

²¹ Dife i teste lor ek larzan; me en zonm i ganny zize dapre son repitasyon.

²² Menm si ou kraz en fou dan en pilon, avek bann lagrenn, son lafoli pa pou separe avek li.

²³ Konn byen sakenn ou bann mouton; pran swen ou bann troupo.

²⁴ Annefe, larises pa reste touzour, en kouronn pa ganny transmet atraver bann zenerasyon.

²⁵ Kan zerb in ganny koupe, verdir i aparet, e zerb lo montanny i ganny ranmase.

²⁶ Mouton ava abiy ou, kabri ava pey ou propriyete;

²⁷ dile kabri ava ase pour nouri ou, ou fanmir ek ou bann servant.