Proverb 26 - Labib An Kreol Seselwa

¹ Parey lannez an ete, oubyen lapli pandan larekolt pa ale ansanm, loner pa ale avek en zonm ki bet.

² Parey zwazo ki pase, parey zirondel ki anvole, malediksyon san rezon pa pran lo personn.

³ En fwet pour en seval, en labrid pour en bourik, en roten pour ledo en fou.

⁴ Pa reponn en fou dapre son lafoli, pour ki ou menm ou pa vin fou.

⁵ Reponn en zonm fou dapre son lafoli; sankwa, i pou krwar i en saz.

⁶ Sa enn ki konfye en mesaz avek en fou, pe koup son prop lazanm e bwar lavyolans.

⁷ En proverb dan labous en fou, i osi feb ki lazanm sa enn ki bwete.

⁸ Si ou met en ros dan en fles, i konmsi ou pe onor en fou.

⁹ En fles leve dan lanmen en bwarer, i parey proverb dan labous en fou.

¹⁰ En sef ki anploy en fou oubyen en soular, i fer ditor tou dimoun.

¹¹ En fou ki repet son betiz, i parey en lisyen ki retourn kot son vomi.

¹² I annan plis lespwar rankontre en fou, ki rankontre en zonm ki krwar i saz.

¹³ En parese i dir: I annan en lyon dan lari! I annan en lyon dan milye semen.

¹⁴ Laport i tourn lo son bann gon, en parese i tourn lo son lili.

¹⁵ Sa enn ki pares i plonz son lanmen dan pla; me i tro fatige pour li anmenn son lanmen kot son labous.

¹⁶ Sa enn ki pares i krwar i pli saz ki set zonm ki reponn avek disernman.

Ankor Plis Proverb

¹⁷ En pasan ki mel li dan dispit ki pa konsern li, i parey sa enn ki atrap en lisyen par zorey.

¹⁸ Sa enn ki tronp son prosen e ki apre dir: Mon ti pe zwe,

¹⁹ i parey en fou anraze ki lans otour li bann tizon anflanmen, ek bann fles mortel.

²⁰ Fot dibwa, dife i tennyen; kan nepli annan medizans, dispit i arete.

²¹ Sa enn ki kontan lager e ki provok bann dispit, i parey sarbon lo labrez e dibwa dan dife.

²² Parol sa enn ki dir dimal i parey en draze ki desann ziska dan fon ou lekor.

²³ Bann parol amikal sorti dan en move leker, i parey larzan brit plake lo en po anter.

²⁴ Sa enn ki annan laenn i kasyet li dan son mannyer koze; dan fon son leker, i pe prepar en move kou.

²⁵ Pa krwar li ler i koz avek bonte, akoz i annan set move panse dan son leker.

²⁶ Par riz, i kapab kasyet son laenn; me son mesanste pou ganny devwale devan lasanble.

²⁷ Sa enn ki fouy en trou pour tonm ladan; ros i tonm lo sa enn ki'n roul li.

²⁸ Dimoun lalang i deteste sa enn ki i pe kraze; bann parol anmyele i koz larin.