Proverb 24 - Labib An Kreol Seselwa

Lasazes ek Malfeter

¹ Pa anvye bann malfeter, ni anvi frekant zot,

² akoz zot leker i mazin zis vyolans e zot labous i dir zis sa ki move.

³ Avek lasazes ki en lakaz i ganny konstri; e avek larezon i vin solid.

⁴ Bann lasanm i ganny meble avek disernman, avek bann lobze presye e zoli.

⁵ En zonm saz i annan bokou lafors. Sa enn ki annan konnesans i pli for.

⁶ Si ou konn byen dirize, ou ava kapab fer lager, ou bann konseye ava fer ou ganny lager.

⁷ Lasazes i tro gran pour en fou; i pa ouver son labous devan laport lavil.

⁸ Sa enn ki prepar fer sa ki mal, i ganny apele en bandi.

⁹ En dimoun bet i mazin touzour fer pese. Zonm i deteste sa enn ki ensolan.

¹⁰ Si ou montre ou dekouraze dan letan maler, alor, ou napa bokou lafors.

¹¹ Delivre sa enn ki ganny kondannen amor, sa enn ki ganny trennen ver labatwar.

¹² Si ou dir: Nou pa ti konnen; eski sa enn ki egzamin leker pa pou konpran? Sa enn ki vey lo ou pa pou konnen? Pa i pou rekonpans sakenn dapre son aksyon?

¹³ Mon garson! Manz dimyel; i bon; dimyel ki koul depi gof i dou dan labous.

¹⁴ Alor, aprann ki lasazes i bon pour ou lavi. Si ou dekouver li, i annan en lavenir pour ou e ou lespwar pa pou perdi.

¹⁵ Pa met en pyez parey en malfeter kont lakaz sa enn ki zis; pa ravaz landrwa kot sa enn ki zis i reste,

¹⁶ akoz sa enn ki zis i kapab tonm set fwa, me i pou touzour leve. Me dan maler, en malfeter pou tonm pour touzour.

¹⁷ Pa pran plezir dan maler ou lennmi; pa montre ou kontantman ler i tonbe,

¹⁸ sankwa, SENYER pou war, e i pa pou kontan, e i pa pou pini ou lennmi.

¹⁹ Pa met ou ankoler kont bann malfeter; pa zalou sa enn ki fer sa ki mal,

²⁰ akoz napa okenn lavenir pour en malfeter. Son lalanp pou tennyen.

²¹ Mon garson! Annan respe pour SENYER ek lerwa; pa frekant sa enn ki oule sanz tou.

²² Annefe, dezas i kapab vit tonm lo li, e lekel ki konnen dega ki i kapab fer!

Lezot Konsey bann Saz

²³ La ankor bann konsey sorti kot bann saz: I pa bon donn fo zizman.

²⁴ Sa enn ki dir avek en malfeter: Ou inosan, pou ganny modi par lepep, bann nasyon pou ankoler kont li.

²⁵ Me sa enn ki averti en malfeter, i fer en bonn aksyon; benediksyon pou vin lo li.

²⁶ Sa enn ki donn en larepons fran i parey en anbrase lo labous.

²⁷ Fini byen ou travay deor; prepar tou lo ou later; apre, ou ava konstri ou lakaz.

²⁸ Pa temwanny san rezon kont ou vwazen; e pa koz manti.

²⁹ Pa dir: Mon pou tret li parey in tret mwan; mon pou fer zot pey pour sa ki zot in fer.

Portre en Parese

³⁰ Mon'n pas pre kot later en parese, pre kot plantasyon rezen en zonm bet.

³¹ Move zerb ti pe pouse partou, move zerb ti'n kouver later e bann miray ti'n tonbe.

³² Mon'n gete, mon'n reflesi, mon'n war e mon'n tir en leson.

³³ Dormi en pe, asoupi en pe, krwaz lebra san nanryen fer.

³⁴ Pandan sa letan lapovrete i vin lo ou koman en voler; lanmizer pour sirprann ou parey en gerye arme.