Proverb 23 - Labib An Kreol Seselwa

¹ Ler ou asiz pour manz avek en dimoun enportan, obzerv byen sa enn ki devan ou.

² Si ou abitye manz tro bokou, limit ou lapeti.

³ Pa ganny lanvi manz son bann bon pla; i kapab en nouritir tronper.

⁴ Pa fatig ou pour vin ris; ganny ase lespri pour ou refize.

⁵ Ler ou lev lizye pour get larises, in fini ale; en kou an gran, i'n ganny lezel, parey en leg, in anvole ver lesyel.

⁶ Pa manz dipen sa enn ki avar; pa anvi son bann bon pla.

⁷ Annefe, i pa mazin sa ki i dir. I dir ou: Manze, bwar! Me son leker pa senser.

⁸ Ou pou vomi sa ki ou'n manze; e ou bann bon parol pa'n servi nanryen.

⁹ Pa koz avek en zonm ki bet; i pou mepriz valer ou bann parol.

¹⁰ Pa deplas bann vye taso balizaz; pa antre dan propriyete en orfelen,

¹¹ akoz son defanser i pwisan, i ava pled son ka kont ou.

¹² Met ou leker pare pour aprann; ouver ou zorey pour ekout bann parol leksperyans.

¹³ Pa ezite pini ou zanfan; i pa pou mor si ou fwet li avek en roten.

¹⁴ Ler ou ava koriz li avek en roten, ou pou sov son lavi dan lemonn lanmor.

Konsey En Papa pour Son Garson

¹⁵ Mon garson! Si ou leker i saz, mon leker osi pou kontan.

¹⁶ Mon et antye pou kontan ler ou labous pour dir laverite.

¹⁷ Pa zalou bann peser dan ou leker; me touzour annan respe anver SENYER,

¹⁸ akoz i annan sirman en lavenir e ou lespwar pa pou perdi.

¹⁹ Ou, mon garson! Ekoute e ou ava vin saz; diriz ou lespri dan bon semen.

²⁰ Pa frekant bann bwarer diven, ni bann ki manz lavyann avek vorasite,

²¹ akoz bann bwarer ek bann ki voras pour vin mizer; e afors nanryen fer, zot pour nepli annan nanryen pour mete.

²² Ekout ou papa ki'n fer ou; pa mepriz ou manman dan son vye zour.

²³ Kiltiv laverite e pa vann li; kiltiv lasazes, lenstriksyon ek disernman.

²⁴ Papa sa enn ki zis pou dan lazwa; sa enn ki ganny en garson saz pour zwaye.

²⁵ Rann ou papa ek ou manman ere; rann ere sa enn ki'n met ou omonn.

²⁶ Mon garson! Donn mwan ou leker; pran plezir swiv mon legzanp.

²⁷ En prostitye i en fose profon; en fanm adilter i en pwi etrwat.

²⁸ I parey en voler ki vey lanbeli; i rann en kantite zonm enfidel.

Portre En Soular

²⁹ Lekel ki kriy: Maler? Lekel ki kriy: Domaz? Lekel ki dispit? Lekel ki plennyen san arete? Lekel ki ganny bate san rezon? Lekel ki annan lizye rouz?

³⁰ Pour sa enn ki pas letan bwar ziska tar; Sa pour sa enn ki kontan labwason melanze.

³¹ Pa get diven avek son zoli kouler rouz, ler i kimen dan ou ver; i desann tro fasilman.

³² Apre, i morde parey en serpan, e pike parey en skorpyon.

³³ Ou lizye pou war bann keksoz drol e ou pou koz anbonnavini.

³⁴ Ou pou parey en zonm ki pe dormi dan milye lanmer; parey en zonm ki anler lo en ma.

³⁵ Ou pou dir: Zot in tap mwan, me mon pa'n ganny blese. Zot in bat mwan, me mon pa'n santi. Kan mon pou leve, mon pou demann en lot ver.