Proverb 22 - Labib An Kreol Seselwa

¹ En bon repitasyon i preferab ki bokou larises; lestim ki dimoun i annan pour ou, i meyer ki lor ek larzan.

² La sa ki ris ek pov i annan ansanm: SENYER ki'n fer tou le de.

³ Ler maler i vini, en zonm pridan i war e i al kasyet; sa enn ki san leksperyans, i fonse e i pey son konsekans.

⁴ Larises, loner ek lavi, i rekonpans sa enn ki posed limilite e respe pour SENYER.

⁵ Semen en zonm ki fo i kouver avek bann bison pikan ek bann pyez. Sa enn ki oule protez son lavi, i evit sa semen.

⁶ Donn en zanfan bann bon labitid depi son zenn az; I ava ankor pe met zot an pratik dan son vye zour.

⁷ Sa enn ki ris i domin lo bann ki pov; sa enn ki demann prete i vin lesklav sa enn ki prete.

⁸ Sa enn ki senm lenzistis pou rekolte maler; e son lakoler pou ganny detri.

⁹ Sa enn ki bon pou ganny beni, akoz i partaz son manze avek bann pov.

¹⁰ Sas sa enn ki ensolan e dispit ava fini; pou nepli annan okenn lager ni lensilt.

¹¹ Sa enn ki kontan en leker pir, e ki koz byen, pour vin zanmi lerwa.

¹² Lizye SENYER i protez vre konnesans, me i rezet parol en zonm fourb.

¹³ Sa enn ki pares i dir: I annan en lyon deor; mon pou ganny touye dan semen.

¹⁴ Labous en fanm devergonde i parey en lafos profon; sa enn ki SENYER i rezete i tonm ladan.

¹⁵ Zanfan i kontan sa ki paret bet. Me roten ki pour fer li sanze.

¹⁶ Sa enn ki kraz en pov pou rann li ris; sa enn ki donn en ris, pou vin pov li menm.

Parol en Saz

¹⁷ Ouver ou zorey, ekout parol bann saz; port atansyon leson mon bann lansennyman.

¹⁸ Annefe, ou pou ere si ou gard zot dan ou leker; gard zot touzour pare dan ou labous.

¹⁹ Pour ki ou met ou konfyans dan SENYER, ozordi, mon'n ansenny ou osi konnesans.

²⁰ Pa mon'n ekri pour ou trant konsey, bann konsey ek bann refleksyon,

²¹ pour fer ou konn sa ki byen e vre, pour ou kapab reponn avek sa enn ki anvoy ou, par bann parol laverite?

²² Pa vol en pov akoz i mizer, ni kraz enn ki dan bezwen devan laport lavil.

²³ SENYER ava pled pour zot e pran lavi sa bann ki'n pran tou avek zot.

²⁴ Pa frekant sa enn ki met li ankoler; pa asosye ou avek bann malsoufran.

²⁵ Ou riske imit zot mannyer fer e ganny pri dan en pyez.

²⁶ Pa fer parey sa bann ki pran responsabilite det lezot.

²⁷ Si ou napa nanryen pour donnen an konpansasyon, zot pou pran ou lili anba ou.

²⁸ Pa deplas bann vye taso balizaz ki ou bann zanset ti poze.

²⁹ Si en zonm i fer byen son travay, ava kapab servi bann lerwa; i pa pou travay pour dimoun ordiner.