Proverb 20 - Labib An Kreol Seselwa

¹ Diven i rann ensolan e labwason for i rann azite; sa enn ki les lalkol soul li, pa kapab vin saz.

² Lakoler en lerwa i parey gronnyman en zenn lyon; sa enn ki fer lerwa ankoler, i riske son lavi.

³ I en loner pour sa enn ki evite fer kankan; zis bann fou ki kontan pran kouler.

⁴ Sa enn ki pares pa travay son later ler fodre; dan letan larekolt, i pou napa nanryen pour rekolte.

⁵ En proze dan leker en zonm i parey delo anba later. En zonm avek disernman i konn servi sa delo.

⁶ Bokou dimoun i dir ki i fidel; me lekel ki kapab trouv en zonm sir?

⁷ Sa enn ki zis i viv onnetman; zanfan ki vin apre li pou byennere.

⁸ Kan lerwa i syez lo son tronn pour rann zizman, i war toudswit sa ki move.

⁹ Lekel ki kapab dir: Mon leker i kler; mon pa'n komet okenn pese?

¹⁰ Annan de pwa, de mezir; SENYER i deteste tou le de.

¹¹ Menm en zanfan, i fer konnen par son konportman, si son bann aksyon pou pir e drwat.

¹² SENYER ki'n fer lizye pour war e zorey pour antann.

¹³ Si ou kontan dormi, ou pou vin pov. Gard ou lizye ouver e ou ava rasazye avek dipen.

¹⁴ Sa enn ki aste i dir: Tro ser. Me apre, i kontan sa ki i'n aste.

¹⁵ Lor ek pyer presyez i annan an annabondans; me labous ki annan konnesans i en bizou presye.

¹⁶ Si en dimoun i vin kot ou pour responsab det en dimoun ki ou pa konnen, pran son lenz an gaz; si i responsab det bann etranze, fodre ou egzize ki i donn en garanti.

¹⁷ Dipen mansonz i dou pour konmanse; me apre, i vin gravye dan labous.

¹⁸ En plan i ganny fer ler ou pran konsey; pour fer lager, kalkil byen koman dirize.

¹⁹ Sa enn ki fer kalonmni i devwal bann sekre; alor, pa frekant dimoun ki koz bokou.

²⁰ Sa enn ki modi son papa oubyen son manman, son lalanp pou tennyen ler fernwanr i fer.

²¹ Fortin ki ou ganny tro vit pa pou profit ou plitar.

²² Pa dir: Mon pou rann lemal pour lemal. Met ou konfyans dan SENYER e i ava sov ou.

²³ SENYER i deteste bann pwa ki'n ganny fose; bann balans fose pa en bon zafer.

²⁴ SENYER ki diriz tou nou lepa; koman alor, en zonm i kapab konpran kote i pe ale?

²⁵ Dir san reflesir: Sa i sakre, i danzere. Pa reflesir selman apre ki ou'n fer en ve.

²⁶ En lerwa saz i fer fannen bann malfeter; i kraz zot anba larou maler lo zot.

²⁷ Konsyans i en lalanp ki SENYER in donn bann imen; i eksplor dan profon leker.

²⁸ Labonte ek lwayote i protez lerwa; son tronn i ganny soutenir par fidelite.

²⁹ Lafyerte lazenes i dan son lafors; labote en vyeyar i dan son seve blan.

³⁰ Sikatris en blesir i en remed kont lemal; bann kou i penetre ziska dan profon leker.