Proverb 19 - Labib An Kreol Seselwa

¹ Vomye en pov ki viv onnetman, ki en ipokrit ki bet.

² Mank refleksyon i pa bon pour personn; sa enn ki tro prese i kapab komet bann fot.

³ Par son lafoli, zonm i perdi semen. Me apre, i met li ankoler kont SENYER.

⁴ Larises i ogmant lakantite zanmi. Me en pov i perdi son sel zanmi.

⁵ En fo temwen pou ganny pini en zour; sa enn ki koz manti pa pou sape.

⁶ Bokou dimoun i rod faver avek dimoun enportan; tou dimoun i zanmi avek sa enn ki donn kado.

⁷ En pov i ganny deteste menm par son bann frer; Anplis, son bann zanmi i les li tonbe. Ler i apel zot pour koz avek zot, zot nepli la.

⁸ Sa enn ki'n ganny lasazes i trouv boner. Sa enn ki annan disernman i viv ere.

⁹ En fo temwen pour ganny pini en zour; sa enn ki koz lalang pour disparet.

¹⁰ I pa bon pour en zonm bet viv dan liks; ankor mwen, pour en lesklav komann bann sef.

¹¹ Sa enn ki pridan i reste pasyan; son loner i fer oubliy en lofans.

¹² Lakoler en lerwa i parey gronnyman en zenn lyon; me son labonte i parey laroze lo zerb.

¹³ En zanfan bet i fer maler son papa. En fanm kankan, i parey en dalo ki pa aret koule.

¹⁴ Ou paran ki fer ou erit lakaz ek larzan; me SENYER ki donn ou en fanm pridan.

¹⁵ Lapares i fer tonm dan sonmey; sonmey i fer soufer lafen.

¹⁶ Sa enn ki respekte bann komannman pou viv; sa enn ki tanpi son mannyer viv, pou mor.

¹⁷ Sa enn ki donn en pov, i pret SENYER; i ava ganny rekonpanse pour tou.

¹⁸ Koriz ou zanfan tan ki i annan lespwar; me pa ale ziska swet son lanmor.

¹⁹ En dimoun vyolan i devre pey son pri: Si ou pa fer li, ou pe ankouraz li pour rekonmanse.

²⁰ Ekout bann konsey e aksepte lenstriksyon; konmsa, plitar, ou ava vin en saz.

²¹ Zonm i fer bokou proze; me zis lavolonte SENYER ki ganny realize.

²² Sa ki nou anvi war dan en zonm, se fidelite. Vomye ou pov, plito ki manter.

²³ Respe anver SENYER i anmenn lavi; ou al dormi rasazye e maler pa tonm lo ou.

²⁴ Sa enn ki pares i plonz son lanmen dan pla; me i pa anmenn son lanmen kot son labous.

²⁵ Si ou tap sa enn ki ensolan, sa enn ki bet ava aprann koman vin pridan. Koriz sa enn ki annan disernman, i ava ganny konnesans.

²⁶ En zanfan ki vyolan anver son papa e ki rezet son manman, i en laont e en dezoner.

²⁷ Mon garson! Si ou aret ekout bann konsey, ou pa pou aprann nanryen.

²⁸ En temwen san moral i bafwe lazistis. Labous bann malfeter i devor sa ki mal.

²⁹ Zizman in pare pour bann ki ensolan; Koudbaton pour ledo sa enn ki bet.