Proverb 18 - Labib An Kreol Seselwa

¹ Sa enn ki viv li tousel i rod son prop lentere; i met li ankoler kont sa enn ki oule ed li.

² Sa enn ki bet pa enterese konpran, me i zis oule fer letalaz son bann lide.

³ Mesanste i anmenn mepri; dezoner i anmenn laont.

⁴ Parol en zonm i parey delo profon; i en sours lasazes deborde parey en larivyer.

⁵ I pa byen donn rezon sa enn ki koupab; oubyen refiz enn ki zis, son drwa

⁶ Lalev en zonm bet i anmenn dispit; son labous i provok bagar.

⁷ Labous sa enn ki bet i koz son larin; son lalev i en pyez pour li.

⁸ Parol sa enn ki dir dimal i parey en draze ki desann ziska dan fon ou lekor.

⁹ Sa enn ki neglizan dan son travay i frer avek sa enn ki detri.

¹⁰ Non SENYER i en tour solid; i en proteksyon pour sa enn ki zis.

¹¹ Fortin sa enn ki ris i en lavil fortifye, e dan son limazinasyon, i en gran miray protekter.

¹² Avan katastrof, leker en zonm i ranpli avek lorgey; me limilite i vin avan loner.

¹³ Sa enn ki reponn avan ekoute, i montre koman i bet e i ganny gognarde.

¹⁴ Lespri en zonm i soutenir li dan maladi; me lekel ki pou remet debout en lespri dekouraze?

¹⁵ En lespri avek disernman i anmenn konnesans; en saz i kontan antann konnesans.

¹⁶ Ofer en kado i ouver bann laport; i permet rankontre dimoun enportan.

¹⁷ Premye ki defann son ka i sanble annan rezon, ziska ler lot parti i demann li bann laprev.

¹⁸ Tiraz osor i aret dispit; i desid ant bann group pwisan.

¹⁹ En frer ki'n ganny ofanse i pli for ki en lavil fortifye; bann dispit i parey bann verou laport en pale.

²⁰ Parol sorti dan labous en zonm i ranpli son vant; sa ki sorti dan son lalev i rasazye li.

²¹ Pouvwar lalang i donn swa lavi oubyen lanmor; sa enn ki kontan koze i devre aksepte son konsekans.

²² Sa enn ki'n trouv en fanm in trouv boner; sa i en faver sorti kot SENYER.

²³ En pov i koz an sipliyan; en ris i reponn avek bann parol dir.

²⁴ Bokou zanmi i anmenn maler, me en vre zanmi i pli lwayal ki en frer.