Proverb 17 - Labib An Kreol Seselwa

¹ Vomye manz en morso dipen sek dan trankilite, ki partisip dan en festen kot i annan dispit.

² En serviter saz ava ranplas en garson ki fer onte. I ganny en par dan patrimwann lafanmir.

³ Dife i teste lor ek larzan; me SENYER i sond leker.

⁴ En malfeter i ekout bann move parol; en manter i ekout bann parol mansonz.

⁵ Sa enn ki mepriz en pov i ensilte son Kreater; sa enn ki kontan maler lezot pou ganny pini.

⁶ Pti zanfan i fer loner bann vyeyar, e bann paran i fer loner zot zanfan.

⁷ Mannyer koze en fou i vilger, ankor mwens, en dirizan ki koz lalang.

⁸ En kado i parey en pyer presyez pour sa enn ki donnen; i krwar ki i pou ouver tou laport.

⁹ Sa enn ki pardonn en lofans i kiltiv lanmitye; me sa enn ki fer rapel dispit i met divizyon ant zanmi.

¹⁰ En repros i annan plis lefe lo en zonm entelizan, ki san koudbaton lo en fou.

¹¹ Dimoun mesan i rod zis fer dezord; e en mesaze kriyel pou ganny anvoye kont li.

¹² Vomye rankontre en lours ki'n perdi son bann piti, ki afront en zonm fou dan son lafoli.

¹³ Maler pa pou zanmen kit lakaz sa enn ki rann lemal pour lebyen.

¹⁴ Sa enn ki konmans en dispit, pe provok en linondasyon. Alor, arete avan ki bagar i konmanse.

¹⁵ SENYER i deteste sa enn ki deklar en koupab inosan e sa enn ki kondann en inosan.

¹⁶ Ki en sonm larzan i kapab fer dan lanmen en fou? Pour li aste lasazes? Non, i tro bet pour fer menm sa.

¹⁷ En zanmi i fidel dan tou sirkonstans; en frer i la pour partaz son difikilte.

¹⁸ Zis en fou ki pran responsabilite det son prosen.

¹⁹ Sa enn ki kontan ofans dimoun, i kontan senm diskord; sa enn ki pas pour enportan pe rod maler.

²⁰ Sa enn ki rize pa pou prospere; sa enn ki koz lalang pou tonm dan maler.

²¹ Sa enn ki met omonn en fou pou ganny problenm; napa lazwa pour paran en zanfan fou.

²² En leker zwaye i en bon remed; me en lespri tris i deperi bann lezo.

²³ Dimoun malonnet i aksepte gous anba latab, pour ki lalwa pa ganny aplike.

²⁴ Lasazes pa lwen avek sa enn ki annan disernman; me lizye sa enn ki bet i get lorizon.

²⁵ Sa enn ki sot i sagrin son papa; i rann tris sa enn ki ti met li omonn.

²⁶ I pa bon kondann en inosan, fwet en dimoun enportan i al kont son drwa.

²⁷ Sa enn ki pa koz bokou i posed konnesans; sa enn ki lespri i kalm i rezonnab.

²⁸ Menm ler en fou pa dir nanryen i pas pour en saz; Ler i ferm son labous, i pas pour entelizan.