Proverb 16 - Labib An Kreol Seselwa

Senyer dan Lavi Tou le zour

¹ Zonm i poz kestyon; me SENYER ki donn larepons.

² Zonm i krwar touzour ki i byen azir; me SENYER ki egzamin fon leker.

³ Konfye ou travay avek SENYER, e ou ava realiz ou bann proze.

⁴ Tou sa ki SENYER in fer i pour en rezon, menm bann malfeter, pour zot ganny pini zour maler.

⁵ SENYER i deteste dimoun arogan; sirman zot pou ganny pini.

⁶ Lalwayote ek lanmour i pardonn en fot; Sa enn ki annan respe pour SENYER i evit fer sa ki mal.

⁷ Kan SENYER i kontan avek mannyer fer en zonm, i rekonsilye son prop lennmi avek li.

⁸ Vomye ganny en pti pe onnetman, ki ganny bokou malonnetman.

⁹ Leker imen i fer bann plan; me SENYER ki diriz son aksyon.

¹⁰ Lerwa i koz avek lotorite sorti kot Bondye; i pa tronpe dan son zizman.

¹¹ Bann balans ek bann mezir zis i pour SENYER ki'n fikse valer bann pwa.

¹² I degoutan pour en lerwa fer sa ki mal, akoz pratik lazistis ki etabli son pouvwar.

¹³ Lerwa i kontan ler ou koz onnetman. I kontan sa enn ki dir laverite.

¹⁴ Lakoler en lerwa i en mesaze lanmor; en dimoun saz i kapab kalme li.

¹⁵ Kan figir lerwa i zwaye, sa i siny lavi; son labonte i parey lapli ki rafresi.

Lavi Sosyal e Moral

¹⁶ Vomye posed lasazes plito ki lor; vomye annan disernman plito ki larzan.

¹⁷ Semen sa enn ki drwat i evit lemal; sa enn ki vey lo son mannyer viv, i protez son lavi.

¹⁸ Lorgey i vin avan dezas; larogans i vin avan larin.

¹⁹ Vomye viv trankilman parmi bann pov, ki ganny en par dan byen malaki avek bann orgeye.

²⁰ Sa enn ki konn fer zafer ava prospere; sa enn ki fer konfyans SENYER ava ere.

²¹ Sa enn ki leker i saz i annan disernman; en parol ki fer plezir i ogmant son savwar.

²² Lasazes i sours lavi pour sa enn ki saz; en fou i ganny pini par son prop betiz.

²³ Sa enn ki saz i reflesi avan koze; konmsa, i kapab konvenk dimoun par son bann parol.

²⁴ Bann zoli parol i parey en gof dimyel; i dou dan pale e bon pour lekor.

²⁵ En semen i paret drwat pour en zonm; me finalman, i en semen ki kondwir ver lanmor.

²⁶ Lafen en travayer i obliz li travay, akoz son vant i pous li pour travay.

²⁷ Dimoun malonnet i mazin fer sa ki mal; son labous i brile pour fer mesanste.

²⁸ Dimoun ki fo i provok bann dispit; sa enn ki fer kalonmni i detri lanmitye.

²⁹ Dimoun vyolan i tronp son prosen; i fer li pran en move semen.

³⁰ Sa enn ki ferm lizye pe prepar en move kou; sa enn ki mord lalev in deza fer sa ki mal.

³¹ Seve blan i en kouronn laglwar ki sa enn ki'n mars lo semen lazistis i gannyen.

³² Vomye en dimoun pasyan ki en gerye; vomye en dimoun ki kontrol son karakter, ki enn ki kaptir en lavil.

³³ Tiraz osor i fer dan en sak; me zis SENYER ki pran desizyon.