Proverb 14 - Labib An Kreol Seselwa

¹ En fanm ki saz i konstri son lakaz; me en fanm bet i kapab kraz li.

² Sa enn ki swiv en semen drwat i respekte SENYER. Me sa enn ki pran move semen i mepriz SENYER.

³ Brans lorgey i bourzonnen dan labous en fou. Parol sorti dan labous en saz i protez li.

⁴ La kot napa toro later pa ganny kiltive, napa manze; lafors en bef i donn bokou rekolt.

⁵ En vre temwen pa koz manti; me fo temwen i vomi zis mansonz.

⁶ Sa enn ki ensolan i rod lasazes me i pa trouv li; pour en dimoun ki reflesi, ganny konnesans pa difisil.

⁷ Pa frekant en fou, ou pa pou aprann nanryen dan sa ki i dir.

⁸ En dimoun pridan i vey lo son kondwit, akoz i saz; me en sot i tonm dan betiz akoz i bet.

⁹ Bann fou pa krwar i neseser repar en fot; me bann dimoun drwat i rod faver Bondye.

¹⁰ Sakenn i konn son prop sagren; personn pa kapab partaz son lazwa.

¹¹ Lakaz en malfeter pou ganny detri; me latant sa enn ki drwat pour prospere.

¹² En semen i kapab paret drwat pour en zonm; me apre, i en semen ki kondwir ver lanmor.

¹³ Leker i kapab tris menm ler ou pe riye; apre, lazwa i kapab vin en sagren.

¹⁴ Sa enn ki viv nenport koman, ava ganny sa ki i merite. En bon dimoun ava ganny sa ki i merite.

¹⁵ En dimoun bet i krwar tou sa ki i tande; me en dimoun pridan i gete kote i met son lipye.

¹⁶ En saz i per maler e i pas akote; sa enn ki bet i azir tro vit akoz i fer tro konfyans.

¹⁷ Sa enn ki ankoler vit, i azir koman en fou; sa enn ki mazin fer sa ki mal i ganny deteste.

¹⁸ Dimoun fou i erit lafoli; dimoun entelizan i ganny kouronnen avek konnesans.

¹⁹ En move dimoun i kourbe devan sa enn ki bon; en malfeter i esper devan laport sa en ki zis.

²⁰ En pov i ganny meprize menm par son bann pros; me en zonm ris i annan bokou zanmi.

²¹ Sa enn ki mepriz son prosen i komet en pese; Byennere sa enn ki bon anver en pov.

²² Sa enn ki rod fer sa ki mal pe mars lo move semen. Sa enn ki rod fer sa ki byen i rankontre labonte ek fidelite.

²³ Tou travay i merit en lapey; sa enn ki pas son letan koze, pour reste touzour pov.

²⁴ Larises i rekonpans sa enn ki saz. Sa enn ki fou i reste dan son lafoli.

²⁵ En temwen ki dir laverite i sov lavi; sa enn ki koz lalang i en tret.

²⁶ Sa enn ki annan respe pour SENYER i viv dan konfyans; son bann zanfan i viv an sekirite.

²⁷ Respe anver SENYER i sours lavi; i ede pa tonm dan bann pyez lanmor.

²⁸ En gran popilasyon i fer laglwar en lerwa. Son pouvwar i bese si son popilasyon i diminyen.

²⁹ Sa enn ki pasyan i rezonnab; sa enn ki ankoler vitman i montre ki i en fou.

³⁰ En lespri trankil i favoriz lasante; me lapasyon i ronz lekor.

³¹ Sa enn ki oprim en pov i ensilte son Kreater; sa enn ki sekour en pov i onor SENYER.

³² Malfeter i ganny kraze par son prop mesanste; me sa enn ki zis i gard konfyans menm devan lanmor.

³³ Lasazes i repoz dan leker en zonm rezonnab; i ganny rekonnet menm parmi bann fou.

³⁴ En nasyon ki pratik lazistis i grandi; me lenzistis i fer laont en pep.

³⁵ Lerwa i apresye en serviter ki azir avek pridans; son lakoler i pour sa enn ki fer li onte.