Proverb 13 - Labib An Kreol Seselwa

¹ En zanfan ki saz i ekout lenstriksyon son papa, me en zanfan ensolan pa ekout okenn repros.

² En bon dimoun i rekolte fri sa ki i dir. Dimoun malonnet i konn zis vyolans.

³ Sa enn ki vey lo parol ki i dir, i protez son lavi. Sa enn ki koz tro bokou, pou konn larin.

⁴ Dezir sa enn ki pares pa zanmen abouti; Me sa enn ki travay dir i realiz tou sa ki i anvi.

⁵ Sa enn ki zis i deteste mansonz; aksyon en malfeter i fer onte e i dezonor lezot.

⁶ Lonnekte i protez sa enn ki azir byen. Mesanste i anmenn larin en malfeter.

⁷ Serten i fer sanblan i ris alor ki i napa nanryen. Serten i fer sanblan ki i pov alor ki i ris.

⁸ Larises i protez lavi sa enn ki ris; me en pov pa zanmen ganny menase.

⁹ Lalimyer sa enn ki zis i rann zwaye; en malfeter i parey en lalanp ki'n tennyen.

¹⁰ Larogans i provok zis dispit; lasazes i avek sa enn ki ekout konsey.

¹¹ Larises ki'n ganny vit i disparet vit; me larises ki'n ganny anmase ptitapti ava ogmante.

¹² Lespwar ki tarde realize i anmenn gran sagren; me en dezir ki realize i en pye dibwa ki donn lavi.

¹³ Sa enn ki pa ekout konsey i fer li menm ditor; sa enn ki respekte bann komannman, pou ganny rekonpanse.

¹⁴ Lansennyman en saz i sours lavi; i ede pour evit bann pyez ki koz lanmor.

¹⁵ Bon refleksyon i anmenn faver lezot; me dimoun san konfyans i swiv en semen perdisyon.

¹⁶ Sa enn ki pridan i reflesir avan azir; me sa enn ki fou i montre son lafoli.

¹⁷ En move mesaze i anmenn maler; en mesaze fidel i anmenn gerizon.

¹⁸ Sa enn ki refize aprann, pou vin pov e ganny meprize. Me sa enn ki aksepte kritik, pou ganny onore.

¹⁹ I en plezir kan en dimoun i realiz son dezir; sa enn ki bet, i deteste evit sa ki mal.

²⁰ Si ou frekant en saz, ou menm, ou ava vin saz; Si ou frekant dimoun ki bet, ou pou ganny problenm.

²¹ Maler i pourswiv sa enn ki fer pese; me boner i rekonpans sa enn ki zis.

²² En bon dimoun i les en leritaz pour son bann pti zanfan; me sa enn ki zis pou erit lafortin en peser.

²³ Later kiltive par en pov i raport bokou manze; me i ganny pran par lenzistis.

²⁴ En papa ki refize koriz son garson pa kontan li. Me paran ki kontan son zanfan, pa ezite koriz li.

²⁵ Sa enn ki zis i annan ase manze pour satisfer son lapeti. Me vant bann malfeter i reste vid.