Proverb 11 - Labib An Kreol Seselwa

¹ SENYER i deteste en balans ki'n fose; me en pwa ki zis, i fer li plezir.

² Ler lorgey i vini, mepri i akonpanny li; me lasazes i akonpanny dimoun senp.

³ Lonnekte i gid sa enn ki zis; me mesanste sa enn ki fo, i anmenn son prop destriksyon.

⁴ Larises pa servi dan nanryen zour lakoler i leve; me lazistis i delivre dan lanmor.

⁵ Lazistis en zonm onnet i gard li lo bon semen; me malfeter i tonbe akoz son mesanste.

⁶ Lazistis en zonm onnet i sov li. Me en tret i ganny pri dan pyez son prop lanvi.

⁷ Lanmor i met en lafen avek lespwar en malfeter; lespwar ki i ti met dan son larises i osi ganny detri.

⁸ Sa enn ki zis i ganny delivre dan son traka; malfeter i vin pran son plas.

⁹ Parol malfeter i kapab detri son prosen; me leksperyans i sov bann ki zis.

¹⁰ Lavil i dan lazwa, ler bann dimoun ki zis i ere. Zot kontan, ler bann malfeter i disparet.

¹¹ En lavil i prospere, gras a son bann zonm drwat. Me i ganny rinen par labous bann malfeter.

¹² Sa enn ki mepriz son prosen napa leker, me en dimoun rezonnab i reste trankil.

¹³ Sa enn ki rakont mansonz i osi devwal sekre; en konfidan i konn gard en sekre.

¹⁴ Ler napa bon direksyon, nasyon i tonbe; me bokou konseye i asir laviktwar.

¹⁵ Aksepte pour pey det en etranze i anmenn problenm; i preferab ki ou refize fer li.

¹⁶ En zoli fanm i ganny onore; zonm for i ganny zis larises.

¹⁷ En bon dimoun i ganny rekonpanse; me sa enn ki kriyel i anmenn maler lo li.

¹⁸ En malfeter i travay pour nanryen; me sa enn ki senm lazistis i ganny en vre rekonpans.

¹⁹ Sa enn ki fer sa ki zis pou viv; me sa enn ki prefer sa ki mal pou mor.

²⁰ SENYER i deteste dimoun ki fourb; i kontan dimoun onnet.

²¹ En malfeter pou sirman ganny pini; me desandans sa enn ki zis pou ganny sove.

²² En zoli fanm san zizman i parey en bag annor dan nennen en koson.

²³ Sa enn ki zis i kontan fer selman sa ki byen; En malfeter i trouv son lespwar dan vanzans.

²⁴ Sa enn ki donn avek gran ker, i vin ankor pli ris; sa enn ki pa rann sa ki i dwa, i vin pli pov.

²⁵ Sa enn ki zenere pour viv dan lopilans; sa enn ki donn delo pa pou zanmen swaf.

²⁶ Lepep i modi sa enn ki gard son dible; me i ranpli avek zoli parol pour sa enn ki vann li.

²⁷ Sa enn ki rod fer dibyen i ganny faver; me maler i tonm lo sa enn ki rod fer dimal.

²⁸ Sa enn ki met son konfyans dan son larises pou tonbe; me sa enn ki zis, pou devlope parey feyaz.

²⁹ Sa enn ki senm dezord dan son menaz pou rekolte divan; en fou pour vin serviter en saz.

³⁰ Fri en dimoun ki zis, i parey en pye dibwa ki donn lavi; me vyolans i fini par pran lavi.

³¹ Si sa enn ki zis i ganny rekonpanse lo later, malfeter ek peser pour osi ganny zot rekonpans.