Proverb 10 - Labib An Kreol Seselwa

Proverb lo Lavi Moral

¹ Proverb Salomon. En zanfan saz i donn lazwa son papa; en zanfan bet i sagrin son manman.

² Byen mal aki pa anmenn okenn benefis. Lazistis i delivre ou dan lanmor.

³ SENYER pa les sa enn ki zis mor lafen. Me i anpes en malfeter ganny sa ki i anvi.

⁴ Lanmen ki pares i anmenn lanmizer; me lanmen ki travay i anmenn larises.

⁵ Sa ki fer provizyon pandan larekolt i pridan; me sa enn ki dormi pandan larekolt i fer onte.

⁶ Benediksyon i lo latet sa enn ki zis. Me labous en malfeter i kasyet vyolans.

⁷ Souvenir sa enn ki zis i anmenn benediksyon. Me non en malfeter pou tonm an pouritir.

⁸ Leker en saz i aksepte bann komannman; me sa enn ki rabase pou konn son pert.

⁹ Sa enn ki viv onnetman i mars an sekirite; me sa enn ki swiv move semen pou ganny pini.

¹⁰ Sa enn ki bat lizye i anmenn problenm; labous bann fou i anmenn larin.

¹¹ Labous en zis i en sours lavi; labous en malfeter i kasyet vyolans.

¹² Laenn i provok lager, me lanmour i kouver tou lofans.

¹³ Lasazes i lo lalev sa enn ki annan disernman; me baton i pour ledo sa enn ki mank larezon.

¹⁴ Konnesans i en trezor pour sa enn ki saz; me sa enn ki rabase pou anmenn larin.

¹⁵ Bann byen en ris i son lavil fortifye; me lanmizer en pov i lakoz son larin.

¹⁶ Lapey sa enn ki zis i donn lavi; me saler en malfeter i anmenn li dan pese.

¹⁷ Sa enn ki aksepte disiplin i lo semen lavi; me sa enn ki refize ganny korize, pe sorti lo bon semen.

¹⁸ Sa enn ki kasyet son laenn i en manter. Sa enn ki fann mansonz i en fou.

¹⁹ Kot i annan bokou koze, pese pa manke; sa enn ki konn kontrol son lalang i pridan.

²⁰ Parol sa enn ki zis i vo plis ki larzan pir; sa ki en malfeter i mazinen pa vo nanryen.

²¹ Parol sa enn ki zis i nouri en lafoul; me bann fou i mor akoz zot latet i vid.

²² Benediksyon SENYER i donn larises; i pa anmenn okenn sagren.

²³ Sa enn ki bet i kontan fer sa ki mal; me sa enn ki annan bon rezonnman i pratik lasazes.

²⁴ Sa ki en malfeter i per, pou tonm lo li. Sa ki en zis i swete, i resevwar.

²⁵ Ler tanpet i vini, malfeter i fannen; me sa enn ki zis i reste pour touzour.

²⁶ Parey vineg i fer grense ledan e lafimen i bril lizye, en travayer ki pares i fer ankoler son met.

²⁷ Respe pour SENYER i fer viv pli lontan; me lavi bann malfeter i ganny rakoursi.

²⁸ Lespwar sa enn ki zis i donn li lazwa; me lespwar en malfeter i fini dan nanryen.

²⁹ Bann plan SENYER i protez sa enn ki drwat; me zot anmenn destriksyon lo bann malfeter.

³⁰ Sa enn ki zis pa pou zanmen tonbe; me bann malfeter pa pou reste dan pei.

³¹ Lasazes i sorti dan labous sa enn ki zis; me lalang bann manter pou ganny koupe.

³² Parol sa enn ki zis i fer plezir; me lalang bann malfeter i fer dimal.