Oze 9 - Labib An Kreol Seselwa

Oze I Anons Pinisyon Izrael

¹ Izrael, pa bezwen rezouir! Aret selebre parey lezot nasyon. Ou'n tonm dan prostitisyon lwen avek ou Bondye e ou'n pran larzan partou kot ou bat dible.

² Ou pa pou ganny ni dible ni diven nouvo ki ou pe espere.

³ Zot pa pou reste dan pei SENYER; Efraim pou retourn Lezip, e i pou manz manze enpir Asiri.

⁴ I pa pou vers lofrann diven devan SENYER; zot sakrifis pa pou fer li plezir. I pou koman en dipen dey, tou sa ki manze pou vin enpir; sa dipen pou zis pour zot vant; i pa pou antre dan tanp SENYER.

⁵ Ki ou pou fer zour rankont pour lafet, zour lafet SENYER?

⁶ Kan zot sove zour katastrof, Lezip ki pou rasanble zot. Lavil Menmfis pou vin zot tonbo. Move zerb pou kouver zot larzan e rons pou anvai zot latant.

⁷ Sa zour in arive, zour rann kont in arive: Izrael pou konnen! Profet in vin fou, sa zonm ki'n ganny enspire pe rabase, akoz grander ou krim ek latak vyolan.

⁸ Bondye in anvoy son profet pour vey lo Efraim; me zot met latrap pour li partou; i ganny atake menm dan tanp Bondye.

⁹ Zot in tonm pli ba dan lemal, parey Gibea lontan. Bondye i rapel zot krim, i pou fer zot rann kont zot pese.

Konsekans Pese Izrael

¹⁰ Mon ti trouv pep Izrael konmsi zot ti rezen dan dezer. Mon ti war zot zanset konmsi ti bann premye fig lo pye. Me zot ti al ver Baal-Peor. Zot ti konsakre zot avek en lobze laont, zot in vin degoutan parey sa bann lobze ki zot kontan.

¹¹ Laglwar Efraim pou anvole parey en zwazo: Pou nepli annan nesans; pou nepli annan fanm ansent; pou nepli annan lansentman.

¹² Menm si zot fer grandi zot zanfan, mon pou pran zot tou, san les en sel. Maler lo zot kan mon kit zot!

¹³ Efraim ti parey en plantasyon palm dan en zoli landrwa, me aprezan, i les son zanfan al ver bann bouro.

¹⁴ Donn zot, SENYER, sa ki ou pou donn zot. Donn zot en vant steril ek tete ki'n sek.

¹⁵ Tou zot move aksyon ti konmans depi Gilgal; la ki mon ti konmans deteste zot. Akoz zot move aksyon, mon pou sas zot se mwan. Mon pa pou kontinyen kontan zot; zot bann sef, zot tou, zot bann rebel.

¹⁶ Efraim in fletri, son rasin in sek; i pa pou raport ankor okenn fri. Si zot fanm i ganny zanfan, mon pou touy bann fri presye ki dan zot vant.

¹⁷ Mon Bondye pou rezet zot, akoz zot pa'n ekout li. Zot pou vin eran parmi bann nasyon.