Oze 8 - Labib An Kreol Seselwa

Senyer I Kondann Izrael pour Ladorasyon Zidol

¹ Met ou tronpet avek ou labous! Maler, parey en leg, in tonm lo lakaz SENYER, akoz zot in kas mon lalyans e zot in revolte kont mon lalwa.

² Zot kriy ver mwan: Mon Bondye, nou Izrael, nou konn ou!

³ Izrael in rezet sa ki byen; Zot lennmi pou pourswiv zot.

⁴ Zot swazir zot lerwa, me san mon lakor. Zot etabli bann sef, me san fer mwan konnen. Zot fabrik zot zidol avek zot larzan ek zot lor, me in anmenn zot destriksyon.

⁵ Samari! Ou zenn bef i ganny rezete. Mon lakoler in monte kont zot. Konbyen letan zot pou kapab viv en lavi inosan?

⁶ Sa zenn bef i sorti kot Izrael, en artizan ki'n fer li. I pa Bondye. Sa zenn bef Samari, pou ganny kas an morso.

⁷ Zot in senm divan; zot pou rekolte tanpet. Dible ki ou plante pa pou donn ou lafarin; si i donnen, bann etranze ki pou manze.

⁸ Izrael in ganny anvale. Aprezan, parmi bann nasyon, i parey en lobze san valer.

⁹ Zot in al Asiri parey en bourik sovaz ki tousel. Efraim in bezwen peye pour li ganny galan.

¹⁰ Kanmenm zot in pey bann nasyon, mon pou rasanble zot. Zot pou soufer anba fardo zot bann lerwa ek zot bann sef.

¹¹ Efraim in ogmant son bann lotel pour pardon pese, zot vin lokazyon pour fer plis pese.

¹² Mon ava kapab ekri bokou detay lo lalwa, me pour zot, sa i drol.

¹³ Menm si zot ofer sakrifis, menm si zot manz lavyann, SENYER pa pe aksepte zot. Aprezan, in rapel zot krim, e fer zot peye pour zot pese. Zot pou retourn Lezip.

¹⁴ Izrael in oubliy son Kreater e i'n konstri bann pale. Zida li, i'n fortifye en kantite lavil. Me mon pou met dife dan son bann lavil, dife pou devor zot bann zoli pale.