Oze 6 - Labib An Kreol Seselwa

Repantans Lepep pa Senser

¹ Zot dir: Annou retour ver SENYER. I'n desir nou, me i ava geri nou. I'n bles nou, me i ava pans nou blesir.

² I pou redonn nou lavi apre de zour; dan trwazyenm zour i pou releve nou, pour nou viv ankor dan son prezans.

³ Annou konn li, annou vreman rode pour konn SENYER. I pou aparet, sa i sir parey lizour i fer. I pou vini zis parey lapli i tonbe, parey lapli i aroz later dan sezon lapli.

⁴ SENYER i reponn: Ki mon pou fer pour ou, Efraim? Ki mon pou fer pour ou, Zida? Ou lanmour i parey nyaz granmaten, parey laroze granmaten, ki disparet.

⁵ Pour sa rezon, mon'n konbat zot par bann profet; mon'n pronons kondannasyon anmor kont ou. Mon zizman i aparet koman lalimyer.

⁶ Lanmour ki mon oule, pa sakrifis zannimo. Mon prefer konnesans Bondye, pa sakrifis konplet.

⁷ Parey zot ti fer dan pei Adan, zot pa'n respekte mon lalyans; zot pa'n reste fidel anver mwan.

⁸ Galaad i en lavil ranpli avek bandi, ek latras disan partou.

⁹ Parey bann bandi, bann pret ti pare pour atake, zot touy dimoun lo semen Sikenm. Sa i en laont.

¹⁰ Dan Izrael, mon'n war bann keksoz degoutan; Efraim in tonm dan prostitisyon; Izrael in rann li enpir.

¹¹ Pour ou osi Zida, byento mon pe prepar en rekolt, mon pou retabli destinen mon pep.