Oze 3 - Labib An Kreol Seselwa

Oze I Kontinyen Kontan Son Fanm Enfidel

¹ SENYER ti dir mwan ankor: Ale e kontan ankor en fanm adilter ki annan en galan. Kontan li parey SENYER i kontan pep Izrael, menm si zot al ver lezot Bondye e zot kontan pake rezen.

² Alor, mon ti reaste mon fanm. Mon ti pey 15 pyes larzan ek 600 lit lorz.

³ Mon ti dir li, “Ou ava reste kot mwan pandan lontan. Pa al vann ou lekor ankor, pa donn ou lekor okenn zonm. Mwan osi, mon ava reste parey ou.”

⁴ Pep Izrael pou reste lontan san en lerwa, san sef, san sakrifis, san ros sakre, ni rob pret, ni pti stati.

⁵ Plitar, Izrael ava retourn ver SENYER, zot Bondye e David zot lerwa. An tranblan, zot ava tourn ver SENYER e ver son bonte dan lavenir.