Oze 2 - Labib An Kreol Seselwa

¹ Dir ou bann frer: Ami! Setadir Mon Pep. Dir osi ou bann ser Rouama! Setadir: Mon Byenneme!

Izrael I parey En Fanm Enfidel

² Fer en prose kont Izrael, ou manman. I nepli mon fanm, e mon nepli son mari! Fer li efas bann mark prostitisyon ki lo son figir. Fer li tir sa bann mark adilter ki ant son tete!

³ Sankwa, mon pou tir li touni, parey i ti ete zour son nesans. Mon pou fer teritwar Izrael vin en dezer; mon pou fer li vin en later konpletman sek. Mon pou fer li mor laswaf.

⁴ Mon pa pou kontan son bann zanfan: Zot bann zanfan en fanm prostitye.

⁵ Annefe, zot manman i en prostitye. Sa enn ki'n met zot omonn, i kouver avek laont. I ti dir: Mon pou swiv mon bann galan ki donn mwan mon manze ek mon delo, mon lalenn ek mon latwal linenn, mon delwil ek mon diven.

⁶ Pour sa rezon, mwan SENYER, mon pou blok son semen. Mon pou antour li avek en bison pikan. I pa pou war semen pase.

⁷ I pou tay deryer son bann galan, me i pa pou zwenn zot. I pou rod zot, me i pa pou trouv zot. Alor, i ava dir: Mon pou retourn kot mon premye mari. Otrefwa, mon ti pli ere ki ozordi.

⁸ I pa ti'n konpran sa: Mwan ki ti pe donn li dible, diven ek delwil. Mon ti donn li larzan ek lor, me i ti servi pour ofer Baal.

⁹ Pour sa rezon, mon pou vin repran mon dible dan letan rekolt, ek mon diven nouvo dan son sezon. Mon pou repran mon lalenn ek mon latwal ki i servi pour kouver son touni.

¹⁰ Aprezan, mon pou tir li touni devan son bann galan. Personn pa pou delivre li dan mon lanmen.

¹¹ Mon pou fer arete son bann lanmizman, son bann lafet, son bann lafet nouvellin, son bann saba ek tou lezot seremoni.

¹² Mon pou detri son bann plantasyon rezen ek son bann pye fig. I ti pe dir: Sa lapey ki mon bann galan in donn mwan. Mon pou fer zot vin en landrwa brousay, kot zannimo sovaz pou vin manze.

¹³ Mon pou fer li peye pour letan ki i'n pase avek bann Baal. I ti ofer zot lansan. I ti abiye dan bag ek kolye pour zot. I ti swiv son bann galan, me mwan, i ti oubliye. SENYER ki deklare.

¹⁴ Pour sa rezon, mon pou sedwir li; mon pou anmenn li dan dezer e reganny son konfyans.

¹⁵ La, mon pou rann li son plantasyon rezen e fer vale Akor, sa vale maler, vin en laport lespwar. I pou swiv mwan parey dan letan son lazenes, parey lepok ki i ti sorti Lezip.

¹⁶ La sa ki SENYER i deklare: Sa zour ou pou apel mwan: Mon mari. I pou nepli apel mwan: Mon Baal.

¹⁷ Mon pou fer disparet non Baal dan son labous. Zot pa pou mansyonn sa non ankor.

¹⁸ Alor, sa zour mon pou fer en lalyans avek tou bann zannimo sovaz, bann zwazo dan lezer, e avek tou bann pti bebet lo later. Mon pou detri tou bann fles, lepe ek tou zarm lager. Mon pou fer zot disparet dan pei e permet bann zabitan dormi an sekirite.

¹⁹ Mon pou fer ou vin mon fanm pour touzour; Ou ava vin mon fanm par lazistis, fidelite ek lanmour.

²⁰ Mon pou reganny ou par mon fidelite e ou ava konn SENYER.

²¹ La sa ki SENYER i deklare: Sa zour mon pou reponn. Lesyel pou reponn sa ki later pe espere.

²² Later pou reponn avek dible, diven nouvo, delwil fre; e zot ava reponn avek sa ki Zizreel pe espere.

²³ Mon pou senmen dan sa pei; mon pou kontan Lo-Rouama setadir, Sa enn ki mon pa kontan. Mon pou apel Lo-Ami: Mon pep e i pou reponn: Mon Bondye.