Oze 10 - Labib An Kreol Seselwa

Lafen Rwayonm Izrael

¹ Izrael ti parey en pye rezen ki ti prodwi bokou fri. Pli i ti prospere, pli i'n ogmant bann lotel zidol. Pli son pei i zoli, pli i'n anbeli bann ros sakre.

² Zot leker pa senser. Aprezan, zot pou bezwen peye. Zot bann lotel pou ganny kraze. Zot bann ros sakre pou ganny detri.

³ Aprezan, zot dir: Nou napa lerwa, akoz nou pa'n montre respe anver SENYER. Ki en lerwa ti pou kapab fer pour nou?

⁴ Zot zis koze e fer bann fo serman ek bann promes vid. Zot bann zizman i file koman en plant anvaisan dan bann fose plantasyon.

⁵ Bann zabitan Samari i tranble devan zot zenn bef. Zot pou port dey pour zot zidol e bann pret pou plere pour zot. Zot ava lamante pour laglwar ki'n al annegzil lwen avek zot.

⁶ I pou ganny ofer avek lerwa Asiri koman en kado pour sa gran lerwa. Efraim pou dan laont. Izrael pou onte avek son bann proze.

⁷ Pour Samari, tou in fini. Son lerwa pe drive koman en bout dibwa lo delo.

⁸ Bann landrwa sakre Aven, la kot Izrael in fer pese, pou ganny detri. Rons ek pikan pou pous lo zot bann lotel. Zot pou dir avek montanny: Kouver nou! Avek kolin: Tonm lo nou!

⁹ Izrael! Depi zafer Gibea, ou'n fer pese e ou pe kontinyen. Alor, pa i normal ki lager pou ariv ziska Gibea?

¹⁰ Mon pou pini zot akoz zot atase avek zot krim. Bann nasyon pou met zot ansanm kont zot.

¹¹ Efraim i en zenis byen drese ki kontan bat dible; kan mon ti dekouver son likou byen miskle, mon ti anvi fer li kas later: Zida ava defrise e Izrael ava kas later.

¹² Senm lazistis e ou ava rekolte fidelite. Defris en nouvo plantasyon: Letan in arive pour ou tourn ver SENYER, pour mwan vin devers lazistis lo ou.

¹³ Ou'n senm lemal, ou'n rekolte krim e ou'n manz fri mansonz. Akoz ou'n kont lo ou prop lafors e lo ou gran larme,

¹⁴ alor, pou annan dega lager parmi ou pep, e tou ou bann fortres pou ganny detri parey Salmann ti detri Bet-Arbel, e bann manman ti ganny kraze avek zot bann zanfan.

¹⁵ Sanmenm ki pou arive avek ou Betel, akoz ou bann gran krim: De ki lizour i fer, lerwa Izrael pou ganny detri.