Oze 1 - Labib An Kreol Seselwa

¹ SENYER ti koz avek Oze, garson Beeri, dan lepok ki Ozyas, Yotanm, Akaz, Ezekyas, bann lerwa rwayonm Zida. Ti osi lepok Zeroboanm, garson Yoas, lerwa rwayonm Izrael.

Lafanmir Oze

² La ki mannyer SENYER ti konmans koz avek pep Izrael atraver Oze. I ti dir Oze: Al marye avek en fanm prostitye, e ou zanfan ava ne dan prostitisyon. Pep sa pei in tonm dan prostitisyon, akoz zot in abandonn SENYER.

³ Alor, Oze ti al marye avek en fanm ki ti apel Gomer, fiy Diblaim. I ti tonm ansent e ganny en garson pour li.

⁴ SENYER ti dir Oze: Apel li Zizreel, akoz dan ankor en pe letan mon pou fer lafanmir Zehou peye pour krim ki zot in komet dan lapenn Zizreel. Mon pou met en lafen avek rwayonm Izrael.

⁵ Sa zour, mon pou detri lafors larme Izrael dan laplenn Zizreel.

⁶ Gomer ti ansent ankor e i ti ganny en fiy. SENYER ti dir Oze: Ou ava apel li Lo-Rouama, savedir: Sa ki mon pa kontan. Mon pou nepli kontan pep Izrael e kontinyen pardonn zot.

⁷ Me mon pou kontan pep Zida. Mwan SENYER zot Bondye, mon pou sov zot san servi fles, ni lepe, ni lager, ni bann seval oubyen kavalye.

⁸ Gomer ti sevre Lo-Rouama; i ti ansent ankor e ganny ankor en garson.

⁹ SENYER ti dir Oze: Apel li Lo-Ami, savedir: Pa mon pep. Annefe, ou pa mon pep, e mwan mon pa egziste pour ou.

Promes Restorasyon

¹⁰ Pep Izrael pou vin koman disab lo bor lanmer, personn pa pou kapab konte. La kot zot ti dir: Ou pa mon pep! Zot pou ganny dir: Zot zanfan Bondye vivan.

¹¹ Pep Zida ek pep Izrael pou rasanble ansanm. Zot pou swazir en sel sef. Zot pou pran posesyon zot pei; sa pou en gran zour pour Zizreel.