Nonm 9 - Labib An Kreol Seselwa

Dezyenm Pak

¹ SENYER ti koz avek Moiz dan dezer Sinai. Sa ti dan dezyenm lannen apre ki zot ti'n sorti Lezip. I ti dir li:

² Pep Izrael i devre fet Pak dat ki i ganny fikse.

³ Zot ava selebre sa lafet dan letan ki'n ganny fikse, lo katorzyenm zour sa mwan, zis apre soley kouse. Gard byen sa ler pour selebre Pak e fer egzakteman dapre son bann rityel ek regleman.

⁴ Moiz ti dir pep Izrael ki zot devre selebre Pak.

⁵ Zot ti selebre Pak lo katorzyenm zour dan sa premye mwan, apre soley kouse. Pep Izrael ti fer egzakteman parey SENYER ti'n ordonn Moiz.

⁶ Me ti annan detrwa dimoun ki pa ti pir, akoz zot ti'n tous en kadav. Zot pa ti kapab selebre Pak sa zour. Alor, sa menm zour, zot ti al war Moiz ek Aaron. Zot ti dir li,

⁷ “Nou dan en leta enpir akoz nou'n tous en kadav. Akoz zot in anpes nou prezant nou lofrann SENYER lo dat fikse parey lezot Izraelit?”

⁸ Moiz ti reponn zot, “Espere, les mwan ekoute ki SENYER ava ordonnen lo zot size.”

⁹ SENYER ti koz avek Moiz:

¹⁰ Dir avek pep Izrael: Si ozordi, oubyen dan bann zenerasyon fitir, en zonm i vin enpir akoz i'n tous en kadav oubyen i pe vwayaze lwen, i ava kanmenm selebre Pak an loner SENYER.

¹¹ Me zot bezwen fer li lo dezyenm mwan, katorzyenm zour apre soley kouse. Zot ava manz mouton avek dipen san lelven ek zerb anmer.

¹² Pa les nanryen reste pour lannmen bomaten; les son karkas antye e pa kas okenn lezo; zot bezwen fer dapre bann lareg konsernan lafet Pak.

¹³ Me sa zonm ki pir, ki pa pe vwayaze e ki pa selebre Pak, i bezwen ganny tire parmi son pep, akoz i pa'n ofer SENYER son lofrann ler ti fodre. Sa zonm ava anmenn konsekans son pese.

¹⁴ Si en etranze pe reste parmi zot e i anvi selebre Pak an loner SENYER, i devre swiv menm regleman ek bann koutim ki'n ganny etabli pour sa lafet. Zot ava aplik menm regleman pour bann etranze e pour bann natif.

¹⁵ Zour ki zot ti dres Latant SENYER, nyaz ti kouver Latant Temwannyaz. Aswar, i ti kouver Latant SENYER avek en lalimyer ziska bomaten.

¹⁶ Sa nyaz ti la toultan. I ti kouver Latant SENYER e aswar i ti annan laparans en dife.

¹⁷ Sak fwa ki nyaz ti leve par lao Latant, pep Izrael ti deplase dan landrwa kot nyaz ti diriz zot. La kot sa nyaz ti arete, bann Izraelit ti kanpe.

¹⁸ Pep Izrael ti deplase lo lord SENYER; e zot ti kanpe lo lord SENYER. Osi lontan ki nyaz ti reste par lao Latant, zot ti kontinyen kanpe.

¹⁹ Kan nyaz ti reste pour lontan lo Latant Rankont SENYER, pep Izrael ti fer servis pour SENYER e zot pa ti deplase.

²⁰ Si nyaz ti reste zis pour detrwa zour lo Latant, zot ti kanpe lo lord SENYER; zot ti deplase lo lord SENYER.

²¹ Parfwa nyaz ti reste zis en lannwit ziska bomaten. Alor, kan nyaz ti leve bomaten, zot osi zot ti deplase. Kan nyaz ti reste en lazournen ek en lannwit e ler i ti leve, zot osi zot ti leve e deplase.

²² Si nyaz ti reste pour de zour, en mwan, ou menm pli lontan par lao Latant, bann Izraelit ti reste kanpe e zot pa ti bouze. Me kan nyaz ti leve, zot ti deplas avek li.

²³ Zot ti kanpe lo lord SENYER; zot ti deplase lo lord SENYER. Zot ti fer bann servis pour SENYER dapre bann direktiv ki SENYER ti donnen par lentermedyer Moiz.