Nonm 6 - Labib An Kreol Seselwa

Bann Lalwa Nazireen

¹ SENYER ti koz avek Moiz:

² Dir avek pep Izrael: Ler en zonm oubyen en fanm i fer ve en Nazireen e konsakre li pour SENYER,

³ sa dimoun pa devre bwar ni diven ni okenn labwason for. I pa devre bwar vineg fer avek diven ni vineg fer avek lalkol. I pa devre bwar okenn zi rezen, ni manz rezen fre ni rezen sek.

⁴ Pandan tou letan son ve, i pa devre manz okenn prodwi ki'n fer avek rezen, pa menm son lagrenn ni son lapo.

⁵ Pandan tou letan son ve, i pa devre raz son latet ziska ler son letan konsekrasyon avek SENYER i terminen. I pou en dimoun sen, e i ava les son seve pouse.

⁶ Pandan letan ki i'n met li apar pour SENYER, i pa devre al obor en kadav.

⁷ I pa devre fer li vin enpir menm si son papa, son manman, son frer oubyen son ser i mor, akoz konsekrasyon SENYER i lo li.

⁸ Pandan tou letan son ve, i sen pour SENYER.

⁹ Si en dimoun i mor sibitman obor li, e ki son ve i ganny profannen, i ava raz son latet lo setyenm zour, ler i fer son pirifikasyon.

¹⁰ Lo wityenm zour, i ava anmenn kot pret devan Latant Rankont SENYER, de tourtrel ouswa de zenn pizon.

¹¹ Pret ava ofer enn pour sakrifis pese e lot pour sakrifis konplet. I ava fer rityel pardon son pese ki i'n fer akoz sa lekor mor. Son menm zour, i ava konsakre son latet.

¹² I ava rekonsakre li pour SENYER pour sa dire letan ki i ti'n fer son ve. I ava anmenn en zenn mouton mal enn an, pour fer en sakrifis reparasyon; me son bann letan konsekrasyon avan, pa pou konte, akoz in kas son ve nazireen.

¹³ Sa i lalwa konsernan bann Nazireen: Zour son letan nazirea i fini, i ava vin devan lantre Latant Rankont SENYER.

¹⁴ I ava ofer SENYER son don: En zenn mouton mal enn an, san defo koman en sakrifis konplet; en zenn femel mouton aze enn an san defo pour en sakrifis pese e en mouton mal adilt san defo, koman en sakrifis lape.

¹⁵ I ava osi anmenn en pannyen plen avek dipen san lelven, gato fler lafarin petri avek delwil e galet san lelven aroze avek delwil, avek lofrann sereal ek lofrann labwason.

¹⁶ Pret ava prezant sa bann lofrann devan SENYER e ofer sakrifis pardon pese e sakrifis konplet.

¹⁷ I ava ofer sakrifis lape en pannyen dipen san lelven; pret ava osi ofer son lofrann sereal ek lofrann labwason.

¹⁸ Alor, sa Nazireen ava raz son latet devan lantre Latant Rankont SENYER, e zet tou son seve dan dife ki brile anba sakrifis lape.

¹⁹ Pret ava pran zepol sa mouton mal adilt, ki'n fini kwi e pran en gato san lelven dan pannyen, en galet san lelven. I ava met tousala dan lanmen sa Nazireen apre ki i'n fini raz son latet.

²⁰ Pret ava prezant sa avek bann rityel devan SENYER. Sa i bann keksoz sen ki pour sa pret, ansanm avek lestoma ek kwis ki ganny prezante. Apre, sa Nazireen ava kapab bwar diven ankor.

²¹ Sa i lalwa konsernan bann Nazireen ki fer en ve. Sa i osi bann prezan ki i devre ofer SENYER pour son nazirea, apar lezot lofrann ki i kapab anmennen. Me i oblize ofer dapre ve ki i'n fer, e dapre lalwa konsekrasyon bann Nazireen.

Laform Benediksyon

²² SENYER ti dir Moiz:

²³ Dir Aaron ek son bann garson: La koman zot pou beni pep Izrael: Zot ava dir:

²⁴ SENYER ava beni ou e protez ou!

²⁵ SENYER ava fer briye son regar lo ou, e akord ou son lagras!

²⁶ SENYER ava lev son regar lo ou e donn ou lape!

²⁷ Konmsa zot ava fer mon non repoz lo pep Izrael e mon ava beni zot.