Nonm 5 - Labib An Kreol Seselwa

Dimoun ki dan Leta Enpir

¹ SENYER ti dir Moiz:

² Donn lord pep Izrael e dir zot ki zot devre met an deor kan, tou bann dimoun ki ganny en maladi ki parey lalep, bann ki annan en desarz e tou bann ki'n vin enpir par kontak avek dimoun mor.

³ Fer sorti tou zonm oubyen fanm; met zot an deor kan pour zot pa kontamin kan kot mon pe reste parmi zot.

⁴ Alor, bann Izraelit ti fer sorti tou sa bann dimoun an deor kan. Lepep ti fer parey SENYER ti'n dir Moiz.

Reparasyon Domaz

⁵ SENYER ti koz avek Moiz:

⁶ Dir kominote Izrael: En zonm oubyen en fanm ki fer ditor son prosen i koupab devan SENYER i koupab.

⁷ I devre konfes sa pese e repar domaz an azoutan en senkyenm son valer e donn sa dimoun ki i'n fer ditor.

⁸ Si sa viktim napa okenn fanmir pour resevwar sa domaz, sa lobze ava al pour SENYER. Pret ava resevwar sa lobze ansanm avek sa mouton ki i pou ofer pour pardon son pese.

⁹ Tou bann lofrann ek bann keksoz sen ki kominote Izrael i anmenn kot pret i pour li.

¹⁰ Bann keksoz sakre ki dimoun i donn pret i pour li.

Ka bann Fanm avek Mari Zalou

¹¹ SENYER ti dir Moiz:

¹² Dir pep Izrael: Si en fanm marye i tronp son mari,

¹³ si en lot zonm ki pa son mari i annan rapor seksyel avek li e sa i pas dan sekre, san ki son mari i konnen; si napa temwen akoz personn pa'n war li dan aksyon;

¹⁴ si en lespri zalouzi i pran sa zonm akoz i annan soupson ki son fanm in dezonor son lekor; oubyen si en lespri zalouzi i pran sa zonm e i soupsonn son fanm me, son fanm pa'n dezonor son lekor;

¹⁵ alor sa zonm ava anmenn son fanm kot pret. I ava anmenn lofrann neseser pour son fanm: 2.5 kilo lafarin lorz. I pa bezwen vid delwil e met lansan avek, akoz i en lofrann vezetal, en lofrann zalouzi pour denons en fot.

¹⁶ Pret ava fer sa fanm aprose e prezant li devan SENYER.

¹⁷ Pret ava pran delo sakre dan en bol an seramik. I ava pran lapousyer ki ater dan sanktyer e met dan sa delo.

¹⁸ Pret ava fer sa fanm prezant li devan SENYER. I ava delarg son seve e met dan son lanmen lofrann vezetal ki i'n anmennen, akoz zalouzi son mari. Sa pret ava tenir dan son lanmen sa delo anmer ki donn malediksyon.

¹⁹ I ava fer sa fanm fer en serman. I ava dir li: Si okenn zonm pa'n dormi avek ou e ki ou pa'n tronp ou mari pour fer sa ki mal e dezonor ou prop lekor, sa delo pou napa okenn lefe advers lo ou.

²⁰ Me si ou'n fer sa ki mal e ou'n avek en lot zonm apar ou mari, si ou'n dezonor ou lekor e ki en lot zonm in annan rapor seksyel avek ou,

²¹ SENYER ava fer ou vin parey sa ki i dir dan sa serman parmi ou kominote. Ou de kwis pou deperi e ou vant pou gonfle.

²² Sa delo ki donn malediksyon ava desann dan ou vant e fer li anfle e ou pou deperi. Sa fanm ava reponn: Amenn! Amenn!

²³ Apre, sa pret ava ekri sa bann malediksyon dan en liv e answit lav dan sa delo anmer.

²⁴ I ava fer sa fanm bwar sa delo anmer ki donn malediksyon. Sa delo anmer ki donn malediksyon ava penetre dan li e fer li santi douler.

²⁵ Pret ava pran sa lofrann dan lanmen sa fanm e depoz li lo lotel devan SENYER.

²⁶ Answit, pret ava pran en ponnyen lafarin dan sa lofrann, bril li lo lotel e apre fer sa fanm bwar sa delo.

²⁷ Apre ki pret in fer li bwar sa delo, la sa ki pou arive: Si i koupab e ki i'n tronp son mari, sa delo ki donn malediksyon pou penetre dan li e donn li douler; son vant pou gonfle e son kwis pou deperi. Sa fanm pou vin parey in dir dan son serman. I ava vin en legzanp malediksyon parmi son pep.

²⁸ Me si sa fanm pa'n dezonor son lekor e ki i pir, i ava ganny deklare inosan e i ava kapab fer zanfan.

²⁹ Sa i lalwa lo bann ka zalouzi ler en fanm ki anba lotorite son mari i dezonor son lekor;

³⁰ oubyen ler en zonm zalou i soupsonn son fanm: Son mari ava fer son fanm konparet devan SENYER. Pret ava aplik lo li tou sa ki lalwa i dir.

³¹ Alor, sa zonm ava lib, me sa fanm ava anmenn konsekans son pese.