Nonm 4 - Labib An Kreol Seselwa

Fonksyon Bann Levit

¹ SENYER ti dir Moiz ek Aaron:

² Parmi bann garson Levi, fer en resansman tou bann garson Keat par fanmir, dapre zot zanset;

³ tou bann ki aze 30 an ziska 50 an, ki kapab travay dan Latant Rankont SENYER.

⁴ Travay ki bann garson Keat pou fer dan Latant Rankont SENYER; zot pou ansarz bann lobze tre sakre.

⁵ Kan kanpman pou deplase, Aaron ek son bann garson ava dekros rido separasyon dan sanktyer e kouver Kof Lalyans.

⁶ Zot ava met en kouvertir lapo zannimo lo la. Apre, zot ava kouver li avek en latwal ble e met son bann bar anplas.

⁷ Lo latab lofrann dipen, zot ava tal en tapi kouler ble e apre met bann pla. Zot ava met bann lakoup, bann bol, flakon delwil. Zot ava osi met Dipen pour lofrann permanan lo sa latab.

⁸ Par lao tou sa, zot ava tal en lot tapi kouler rouz e en lot kouvertir lapo zannimo lo la. Apre, zot ava met son bann bar avek latab.

⁹ Apre sa, zot ava pran en tapi kouler ble pou kouver portlanp ek son bann lalanp, son bann tennywar ek son bann bobes lalanp, bann sandriye ek tou bann resipyan pour delwil.

¹⁰ Zot ava met tou sa bann lobze dan en sak an kwir e met lo son brankar.

¹¹ Lo lotel annor, zot ava met en tapi kouler ble e en kouvertir an kwir. Apre, zot ava plas son bann bar.

¹² Zot ava pran tou sa bann lobze ki servi dan sanktyer, zot ava met tou dan en tapi kouler ble. Apre, zot ava met en kouvertir an kwir e plas tou lo brankar.

¹³ Zot ava tir tou lasann lagres ki lo lotel e zot ava kouver li avek en tapi kouler rouz.

¹⁴ Zot ava met lo lotel tou bann istansil ki servi pour sakrifis: Pwalon, fourset, lapel, bol, tou bann istansil ki servi lo lotel. Zot ava met en kouvertir an kwir par lao e met bann bar avek lotel.

¹⁵ Kan zot lev kan, ler Aaron ek son bann garson in fini kouver sanktyer avek tou son bann akseswar, bann garson Keat ava vini pour transport li. Me zot pa devre tous okenn sa bann lobze sakre. Si zot fer sa, zot pou mor. Sa i bann lobze dan Latant Rankont SENYER ki bann garson Keat a bezwen transporte.

¹⁶ Eleazar, garson pret Aaron, pou ansarz delwil pour bann lalanp, lansan parfimen, lofrann vezetal, delwil pour konsekrasyon: I pou ansarz tou sa ki pase dan Latant Sanktyer e lo son bann istansil.

¹⁷ SENYER ti dir Moiz ek Aaron:

¹⁸ Ou pa devre les klan bann Keatit ganny detri parmi bann Levit.

¹⁹ La sa ki ou ava fer pour zot pa mor ler zot apros landrwa sakre: Aaron ek son bann garson ava plas zot devan sa ki zot pou transporte.

²⁰ Zot pa devre antre dan Latant pour get okenn lobze sakre, pa menm pour en pti moman letan, pangar zot mor.

Travay bann Gersonit

²¹ SENYER ti dir Moiz:

²² Fer en lalis bann garson Gersonn, par fanmir dapre zot zanset.

²³ Fer resansman tou sa bann ki aze ant 30 e 50 an e ki kapab fer servis dan Latant Rankont SENYER.

²⁴ La travay ki bann Gersonit pou fer e sa ki zot devre transporte:

²⁵ Zot pou transport rido ek bann latwal kouvertir Latant SENYER; bann kouvertir avek lapo zannimo ki kouver Latant Rankont SENYER; rido ki devan la lantre Latant Rankont SENYER,

²⁶ bann rido lakour eksteryer ki antour Latant SENYER ek rido lantre devan, avek tou son bann lakord ek son bann zagraf. Tousala i travay bann Gersonit.

²⁷ Bann Gersonit ava travay anba direksyon Aaron ek son bann garson, swa dan sa ki zot pou transporte, swa dan lezot travay ki zot pou fer. Ou ava diriz zot dan tou sa ki zot pou fer.

²⁸ Sa i travay bann Gersonit dan Latant Rankont SENYER. Itamar, garson pret Aaron, ava sirvey zot travay.

Travay bann Merarit

²⁹ Fer en lalis tou bann Merarit par fanmir dapre zot zanset.

³⁰ Fer en resansman lo tou bann ki aze 30-50 an, ki kalifye pour fer en servis dan Latant Rankont SENYER.

³¹ La sa ki zot devre transporte; sa i zot travay dan Latant Rankont SENYER: Bann lankadreman, sevron, kolonn, lipye kolonn,

³² kolonn ki toultour lakour eksteryer e zot lipye, son bann pike e zot lakord, tou son bann zouti. Ou ava donn sakenn son morso pour li transporte.

³³ Sa i pou travay bann garson Merari; i zot travay dan Latant Rankont SENYER. I pou tonm anba sirveyans Itamar, garson pret Aaron.

Resansman bann Levit ki dan Servis

³⁴ Moiz, Aaron ek bann dirizan kominote Izrael ti fer en resansman tou bann garson Keat, par klan e par fanmir;

³⁵ tou sa bann ki ti aze ant 30 e 50 an, ki ti kapab antre dan servis Latant Rankont SENYER.

³⁶ Ti annan 2,750 zonm an tou, par klan.

³⁷ Sa ti total bann Keatit, tou sa bann ki ti kalifye pou travay dan servis Latant Rankont SENYER, bann ki Moiz ek Aaron ti konte, dapre sa ki SENYER ti'n ordonnen, par lentermedyer Moiz.

³⁸ Total bann garson Gersonn par fanmir,

³⁹ tou sa bann ki aze ant 30 e 50 an e ki ti kalifye pou travay dan servis Latant Rankont SENYER:

⁴⁰ An tou 2,630 zonm dan zot klan e dan zot fanmir.

⁴¹ Sa ti total bann Gersonit, tou sa bann ki ti kapab travay dan servis Latant Rankont SENYER, dan resansman ki Moiz ek Aaron ti fer, dapre sa ki SENYER ti ordonnen.

⁴² Sa ti total bann Merarit, par klan e par fanmir,

⁴³ tou sa bann ki aze ant 30 e 50 an e ki kalifye pou travay dan servis Latant Rankont SENYER:

⁴⁴ An tou, ti annan 3,200 zonm dan zot bann klan.

⁴⁵ Sa ti total bann garson Merari ki Moiz ek Aaron ti konte dan resansman fer dapre lord SENYER par lentermedyer Moiz.

⁴⁶ La total tou bann Levit ki Moiz, Aaron ek bann dirizan pep Izrael ti konte, par fanmir dapre zot zanset,

⁴⁷ tou sa ki aze ant 30 e 50 an e ki devre fer en servis dan Latant Rankont SENYER, travay pour transport pake:

⁴⁸ 8,580 zonm an tou.

⁴⁹ Dapre lord SENYER, anba direksyon Moiz, sakenn ti ganny son responsabilite e kwa ki pou transporte; sakenn ti'n ganny son travay ki SENYER ti'n ordonn Moiz.