Nonm 36 - Labib An Kreol Seselwa

Par Posesyon pour En Fanm Marye

¹ Bann sef fanmir sorti dan klan bann desandan Galaad, garson Makir, garson Manase, en klan Zozef, ti koz avek Moiz ek bann sef tribi pep Izrael.

² Zot ti dir: SENYER in ordonn ou pour partaz pei, avek bann Izraelit, par tiraz osor. Mon senyer ou'n osi ganny lord sorti kot SENYER pour donn par patrimwann nou frer, Selofad, avek son bann fiy.

³ Si zot marye avek en zonm ki sorti dan en lot tribi Izrael, zot par ava ganny tire dan patrimwann nou zanset e ganny azoute avek par sa tribi kot in marye. Sa ava diminyen nou par.

⁴ An plis, dan lannen zibile pour pep Izrael, zot par pou ganny azoute dan patrimwann sa tribi kot zot in marye, e i ava ganny tire dan patrimwann tribi nou zanset.

⁵ Moiz ti transmet avek pep Izrael sa lord sorti kot SENYER, “Dimoun dan lafanmir Zozef i annan rezon.

⁶ Alor, la ki SENYER i ordonn bann fiy Selofad: Zot ava marye avek sa ki zot oule, a kondisyon ki zot marye dan tribi zot zanset.

⁷ Konmsa, okenn later Izrael pa pou ganny transfere sorti dan en tribi pour al dan en lot; sak Izraelit ava gard patrimwann son tribi.

⁸ Tou fiy ki erit later sorti dan en tribi Izrael, ava bezwen marye avek en zonm ki sorti dan sa tribi; dan sa fason, sak Izraelit ava gard patrimwann son zanset.

⁹ Okenn par patrimwann pa pou sorti dan en tribi pour pas dan en lot tribi. Sak tribi ava kontinyen byen gard son propriyete.”

¹⁰ Bann fiy Selofad ti fer parey sa ki SENYER ti'n ordonn Moiz.

¹¹ Mala, Tirsa, Hogla, Milka ek Noa ti marye avek bann garson zot tonton.

¹² Alor, zot ti marye avek bann zonm sorti dan tribi Manase, bann garson Zozef. Zot par patrimwann ti reste dan tribi zot zanset.

¹³ Sa ti bann komannman ek bann regleman ki SENYER ti donn pep Izrael, par lentermedyer Moiz, kan zot ti dan laplenn Moab, obor larivyer Zourden, vizavi Zeriko.