Nonm 35 - Labib An Kreol Seselwa

Lavil pour bann Levit

¹ SENYER ti koz avek Moiz dan laplenn Moab, obor larivyer Zourden, vizavi Zeriko:

² Donn lord bann Izraelit pour ki dan zot par, zot donn en lavil bann levit kot pour zot reste. Zot devre osi donn laplenn otour sa bann lavil.

³ Sa bann lavil ava pour zot reste ladan, bann laplenn pour zot troupo, pour zot byen ek lezot zannimo ki zot annan.

⁴ Later ki zot pou donn bann levit ava mezir 500 met depi miray lo sak kote otour miray lavil.

⁵ Ou ava mezir 1,000 met sak kote lavil: 1,000 met dan Les, 1,000 met dan Sid, 1,000 met dan Was, 1,000 met dan Nor; lavil pou dan milye.

⁶ Ou ava donn zot osi, sis lavil refiz, kot bann kriminel ava kapab al reste. Zot ava azout 42 lezot lavil.

⁷ Zot ava donn bann levit 48 lavil an tou, avek bann laplenn ki otour.

⁸ Kantite lavil ki bann tribi pou donn bann levit pou ganny determinen par grander zot teritwar, par propriyete ki zot in gannyen. Sa enn ki'n ganny pli bokou ava donn plis; sa enn ki'n ganny mwens ava donn mwens.

Bann Lavil Refizye

⁹ SENYER ti koz avek Moiz. I ti dir li:

¹⁰ Dir bann Izraelit: Ler zot ava travers larivyer Zourden e antre dan pei Kanaan,

¹¹ zot ava swazir bann lavil kot bann kriminel ava kapab al rod refiz, si zot in touy en dimoun par aksidan.

¹² Sa bann lavil pou en landrwa sekirite, pangar bann fanmir sa viktim i touy li avan ki i ganny zize devan kominote.

¹³ Swazir sis lavil refiz:

¹⁴ Trwa lavil lo kote Les larivyer Zourden; e trwa lavil dan pei Kanaan.

¹⁵ Sa sis lavil ava servi koman en landrwa pour bann refizye Izraelit e bann etranze rezidan tanporer ki parmi zot. Sa enn ki'n komet en krim envolonterman, ava kapab al pran refiz dan sa bann lavil.

Konsernan Mert ek Revanz

¹⁶ Si en dimoun i tap son prosen avek en feray e i mor, sa dimoun i en kriminel e devret ganny kondannen anmor.

¹⁷ Si i'n tap en dimoun avek en ros ki kapab koz son lanmor, sa kriminel devret ganny met anmor.

¹⁸ Si i'n tap en dimoun avek en lenstriman an bwa ki kapab donn lanmor, sa kriminel devret ganny met anmor.

¹⁹ Vanzer disan ava touy sa mertriye kan i ava zwenn li.

²⁰ Si en dimoun, i pous son prosen ki i deteste; si par mesanste, in zet keksoz lo li, e ki sa dimoun i mor;

²¹ si par mesanste, i'n tap li koudpwen e sa dimoun i mor; sa dimoun ki'n tap li i merit lanmor; i en mertriye. Vanzer disan sa viktim ava annan drwa met li anmor; i ava fer sa ler i zwenn li.

²² Me si i'n pous li par azar, san mesanste; si i'n anvoy en lobze lo li non pa par mesanste;

²³ si i les tonm lo en dimoun, en ros ki kapab touye; si sa ros i touy sa dimoun ki pa ti son lennmi e ki i pa ti pe rod fer li dimal,

²⁴ alor, kominote ava baz zizman dapre sa bann regleman ant sa enn ki'n tape ek son vanzer disan.

²⁵ Kominote ava protez sa dimoun kont vanzer disan e retourn li dan lavil refiz. I ava reste la ziska lanmor Gran-Pret ki ti ganny konsakre avek delwil sen.

²⁶ Me si sa kriminel i oze sorti dan lavil refiz,

²⁷ e ki vanzer i zwenn li an deor teritwar sa lavil e i touy li, sa vanzer pa pou koupab okenn krim.

²⁸ Sa zonm ki'n komet sa mert ava reste dan sa lavil refiz ziska lanmor Gran-Pret. Apre lanmor Gran-Pret, i ava kapab retourn kot li.

²⁹ Sa i bann lalwa ki zot devre garde toultan e partou kot zot ava reste.

³⁰ Dan tou bann ka mert, fodre depozisyon plizyer temwen avan ki en kriminel i ganny kondannen anmor. Zis en temwen pa ase pour fer pas en santans lanmor.

³¹ Ou pa pou aksepte larzan pour sov lavi en kriminel ki koupab; i devret ganny met anmor.

³² Ou pa devre aksepte larzan pour les en dimoun al refizye dan en lavil refiz oubyen sorti pour al reste dan pei, avan lanmor Gran-Pret.

³³ Ou pa pou profann pei kot ou pe reste. Annefe, disan i rann enpir pei. Zis disan sa dimoun ki'n touye ki kapab lav disan ki'n rann pei enpir.

³⁴ Pa bezwen rann enpir later kot ou reste, e kot mon reste, akoz mwan SENYER mon reste parmi pep Izrael.