Nonm 34 - Labib An Kreol Seselwa

Frontyer Pei

¹ SENYER ti koz avek Moiz. I ti dir li:

² Donn sa lord bann Izraelit: Kan zot ava antre dan pei Kanaan, later ki mon'n donn zot, la son bann balizaz ek son bann frontyer:

³ Dan Sid, zot teritwar ava baliz avek dezer Sin, kontinyen avek teritwar Edonm. Dan Les, i ava konmans depi Sid avek lanmer Mor.

⁴ Apre, i ava desann dan Sid e kontourn ver montanny Akrabim; i ava travers dezer Sin, pour fini dan Sid, Kades Barnea. Apre sa, i ava kontinyen ziska Hasar-Adar e al ziska Asmonn.

⁵ Kitan Asmonn, i ava kontinyen ziska frontyer Lezip e fini dan lanmer Mediterane.

⁶ Lanmer Mediterane ava zot frontyer Was; i ava form zot frontyer lo kote Was.

⁷ Zot frontyer dan Nor ava konmans avek lanmer Mediterane e mont ziska Montanny Hor.

⁸ Depi Montanny Hor, ou ava fer li pas par Sedad, ziska lantre Hamat.

⁹ Apre, i ava pas par Zifronn e fini Hasar-Enann. Sa ava ou frontyer Nor.

¹⁰ Zot balizaz dan Les ava konmans kot Hasar-Enann ziska Sefanm.

¹¹ Apre, sorti Sefanm, i pou desann Ribla, Les avek Ain; apre, i pou al ziska Les Lak Zenezaret.

¹² I pou redesann Sid tou dilon larivyer Zourden e fini dan lanmer Mor. Sa pou zot teritwar avek tou son bann frontyer.

¹³ Moiz ti transmet sa lord avek bann Izraelit: Sa i pei ki SENYER in donn sa nef tribi ek sa demi tribi, par tiraz osor.

¹⁴ Tribi Riben, Gad ek demi tribi Manase in fini ganny zot patrimwann dapre zot fanmir,

¹⁵ lo lot kote larivyer Zourden dan Les, vizavi Zeriko.

Bann Sef Responsab Partaz Pei

¹⁶ SENYER ti koz avek Moiz. I ti dir li:

¹⁷ Pret Eleazar ek Zozye, garson Noun, pou fer partaz pei.

¹⁸ Ou ava osi pran en sef dan sak tribi, pour ed zot fer sa partaz.

¹⁹ La zot non: Pour tribi Zida: Kaleb, garson Zefoune.

²⁰ Pour tribi Simeon: Samyel, garson Amihoud.

²¹ Pour tribi Benzamen: Elidad, garson Kislonn.

²² Pour tribi Dan: Bouki, garson Yogli.

²³ Pour desandan Zozef, pour tribi Manase: Hanyel, garson Efod.

²⁴ Pour tribi Efraim: Kemouel, garson Siftann.

²⁵ Pour tribi Zabilon: Elisafann, garson Parnak.

²⁶ Pour tribi Isakar: Paltiel, garson Azann.

²⁷ Pour tribi Aser: Ahihoud, garson Selomi.

²⁸ Pour tribi Neftali: Pedael, garson Amihoud.

²⁹ Sa ti bann sef tribi ki SENYER ti'n swazir pour fer partaz later dan pei Kanaan, posesyon pep Izrael.