Nonm 31 - Labib An Kreol Seselwa

Lager kont Bann Madyanit

¹ SENYER ti koz avek Moiz. I ti dir li:

² Pini bann Madyanit pour sa ki zot in fer pep Izrael. Apre, ou ava kapab al kot ou bann zanset.

³ Alor, Moiz ti dir pep Izrael: Met zot pare pour al lager e atak bann Madyanit, pour zot egzekit vanzans SENYER lo Madyann.

⁴ Zot ava anvoy 1,000 gerye sorti dan sak tribi Izrael pour al lager.

⁵ Alor, parmi bann milye zonm dan Izrael, 1,000 zonm ti ganny swazir dan sak tribi; an tou 12,000 ti met zot pare pour al lager.

⁶ Moiz ti anvoy zot lager 1,000 par tribi ansanm avek Fineas, garson pret Eleazar ki ti ansarz bann lobze sakre ek bann tronpet.

⁷ Zot ti al atak Madyann parey SENYER ti'n ordonn Moiz; zot ti touy tou bann zonm.

⁸ Zot ti touy osi sa senk lerwa Madyann: Evi, Rekenm, Zour, Hour, Reba. Zot ti osi touy Balaanm, garson Beor.

⁹ Pep Izrael ti pran prizonnyen bann fanm Madyanit ek zot zanfan. Zot ti sezi zot bann zannimo, zot troupo ek tou zot byen koman piyaz lager.

¹⁰ Zot ti met dife partou dan bann lavil ek kanpman.

¹¹ Zot ti anmenn avek zot, tou sa bann byen ki zot ti'n sezi, enkli dimoun ek zannimo.

¹² Zot ti anmenn bann prizonnyen ek bann byen kot Moiz, pret Eleazar e devan pep Izrael ki ti pe kanpe dan laplenn Moab, obor larivyer Zourden, vizavi Zeriko.

Larme I Retournen

¹³ Moiz, pret Eleazar ek tou bann sef kominote ti sorti dan kanpman pour al zwenn zot.

¹⁴ Moiz ti pran lakoler kont sa bann komandan larme: Bann sef 1,000 ek sef 100 ki ti'n retournen sorti lager.

¹⁵ I ti demann zot: Akoz zot in gard tou sa bann fanm vivan?

¹⁶ Zot menm zot sa bann fanm ki, lo konsey Balaanm, ti antrenn bann Izraelit dan lenfidelite anver SENYER, kan nou ti kanpe Peor. Akoz zot ki sa fleo ti tonm lo pep SENYER.

¹⁷ Aprezan, al touy tou bann zenn garson ek tou bann fanm ki'n deza dormi avek en zonm.

¹⁸ Me gard pour zot, tou bann zenn fiy ki pa ankor dormi avek en zonm.

¹⁹ Zot ava reste an deor kan pandan set zour. Sa bann parmi zot ki'n touy dimoun oubyen ki'n tous en kadav, ava bezwen pirifye zot ek zot prizonnyen, trwazyenm zour e setyenm zour.

²⁰ Zot bezwen pirifye tou zot lenz, tou lobze an kwir, avek pwal kabri, ek tou bann lobze an bwa.

²¹ Pret Eleazar ti dir avek bann gerye ki ti'n al lager: La bann regleman ki SENYER in donn Moiz:

²² Lor, larzan, bronz, feray, ferblan, diplon,

²³ ava bezwen pas dan dife pour ganny pirifye. Me zot ava osi ganny pirifye avek delo pirifikasyon. Tou sa ki pa reziste dife ava pas dan delo.

²⁴ Setyenm zour, zot ava lav zot lenz e zot ava vin pir. Apre, zot ava kapab antre dan kan.

Distribisyon Piyaz Lager

²⁵ SENYER ti dir Moiz:

²⁶ Ou, avek pret Eleazar, bann sef fanmir dan kominote, fer lenvanter tou sa bann depouy lager, dimoun ek zannimo.

²⁷ Partaz tousala an de: En par pour bann zonm ki ti al lager, en lot pour kominote.

²⁸ Dan par bann zonm ki ti al lager, tir en par pour SENYER: En zonm lo sak 500, en zannimo lo sak 500, bef, bourik, kabri ek mouton.

²⁹ Ou ava pran sa lo zot par e ou ava donn pret Eleazar koman en don pour SENYER.

³⁰ Lo lanmwatye ki vin pour pep Izrael, ou ava pran enn lo sak 50 dimoun, bef, bourik, mouton oubyen kabri, ek tou zannimo. Ou ava donn sa bann levit ki asir servis dan Latant prezans SENYER.

³¹ Moiz ek pret Eleazar ti fer sa ki SENYER ti'n ordonn Moiz.

³² La tou sa ki zot ti sezi dan lager: Kabri ek mouton 675,000;

³³ bef: 72,000;

³⁴ bourik: 61,000.

³⁵ An sa ki konsern bann et imen, savedir bann fiy ki pa'n dormi avek en zonm, ti annan 32,000 an tou.

³⁶ Pour sa lanmwatye par ki ti vin pour bann zonm ki ti al fer lager, ti annan 337,500 kabri ek mouton.

³⁷ Par pour SENYER: 675 kabri ek mouton.

³⁸ Lo 36,000 bef, 72 ti vin pour SENYER.

³⁹ Lo 30,500 bourik, 61 ti vin pour SENYER.

⁴⁰ Lo 16,000 dimoun, 32 ti vin pour SENYER.

⁴¹ Moiz ti donn pret Eleazar, par ki ti ganny rezerve pour SENYER, parey SENYER ti'n ordonnen par lentermedyer Moiz.

⁴² Konsernan sa lanmwatye ki ti vin pour pep Izrael, ki Moiz ti'n tire lo bann zonm ki ti al lager,

⁴³ sa lanmwatye ki ti vin pour kominote: 337,500 kabri ek mouton;

⁴⁴ bef: 36,000;

⁴⁵ bourik: 30,500

⁴⁶ ek 16,000 et imen.

Lofrann Volonter pour Bondye

⁴⁷ Parey SENYER ti'n ordonn li, Moiz ti tir lo par pep Izrael 50 zonm ek zannimo. I ti donn sa avek bann levit ki ti responsab servis dan tanp SENYER.

⁴⁸ Bann zofisye ki ti komann bann inite plis ki 1,000 dan kanpanny larme; sef 1,000 ek sef 100 ti apros Moiz.

⁴⁹ Zot ti dir li: Nou'n kont tou bann zonm ki ti anba nou komann e napa okenn ki manke.

⁵⁰ Alor, nou pou anmenn pour SENYER tou sa bann lobze ki nou'n sezi: Lobze annor, sennon, brasle, bag, zanno, kolye. Nou pe anmenn tousala devan SENYER koman lofrann pardon pour nou pese.

⁵¹ Moiz ek pret Eleazar ti resevwar tou sa bann bizou.

⁵² Lor ki sa bann zofisye larme ti anmennen koman par pour SENYER, ti fer an tou 200 kilo.

⁵³ Bann zonm ki pa ti zofisye, ti gard pour zot sa ki zot ti'n sezi.

⁵⁴ Alor, Moiz ek pret Eleazar ti pran sa lor sorti kot bann komandan 1,000 ek 100 e poz dan Latant Rankont, koman en memoryal devan SENYER.