Nonm 29 - Labib An Kreol Seselwa

Lofrann pour Lafet Nouvel An

¹ Premye zour, setyenm mwan, zot ava fer en rasanbleman sakre. Zot pa pou travay sa zour. I ava en zour lafet.

² Zot ava ofer en sakrifis konplet ki donn en loder ki fer plezir SENYER: En toro, en mouton mal adilt ek set zenn mouton mal, enn an, san okenn defo.

³ Prezant en lofrann vezetal petri avek delwil doliv: Trwa kilo lafarin pour sak toro, de kilo pour sak mouton mal adilt,

⁴ e kat kilo pour sak zenn mouton mal, enn an.

⁵ Zot ava osi ofer en bouk pour pardon zot pese.

⁶ Sa bann sakrifis ava anplis, avek sakrifis konplet pour nouvellin, son lofrann vezetal, ek bann sakrifis ordiner, son lofrann vezetal ek lofrann diven dapre regleman. Sa bann lofrann ava donn en loder ki fer plezir SENYER.

Lofrann Rekonsilyasyon pour Zour Pardon

⁷ Dizyenm zour, setyenm mwan, zot ava fer en rasanbleman sakre. Zot pa devre manz nanryen, ni travay sa zour.

⁸ Zot ava ofer en sakrifis konplet ki donn en loder ki fer plezir SENYER: En zenn toro, en mouton mal adilt ek set zenn mouton mal enn an. Zot devret san okenn defo.

⁹ Prezant zot lofrann vezetal meyer kalite petri avek delwil doliv: Trwa kilo lafarin pour sak toro, de kilo pour sak mouton mal adilt

¹⁰ e en kilo pour sak zenn mouton mal enn an.

¹¹ Zot ava osi ofer en bouk pour rityel pardon zot pese, ansanm avek zot sakrifis konplet ordiner, son bann lofrann vezetal ek diven.

Lofrann Lafet Latant

¹² Kenzyenm zour dan setyenm mwan, konvok en rasanbleman sakre e selebre en lafet an loner SENYER pandan set zour. Zot pa devre travay sa zour.

¹³ Premye zour, zot ava ofer en sakrifis konplet ki donn en loder ki fer plezir SENYER: 13 zenn toro, de bouk ek 14 zenn mouton mal, aze enn an e san okenn defo.

¹⁴ Zot ava prezant en lofrann vezetal petri avek delwil doliv: Trwa kilo lafarin pour sak toro, de kilo pour sak mouton mal adilt,

¹⁵ en kilo pour sak zenn mouton mal, enn an.

¹⁶ An plis, ofer en bouk pour pardon zot pese, ansanm avek zot sakrifis konplet ordiner, zot lofrann vezetal avek diven.

¹⁷ Dezyenm zour, zot ava ofer 12 zenn toro, de mouton mal e 14 zenn mouton mal, enn an, tou san defo.

¹⁸ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman

¹⁹ Zot ava osi ofer en bouk pour pardon pese apar sakrifis konplet ordiner, bann lofrann vezetal ek diven.

²⁰ Trwazyenm zour, zot ava ofer 11 zenn toro, de mouton mal adilt ek 14 zenn mouton mal, enn an, tou san okenn defo.

²¹ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman.

²² Anplis zot sakrifis konplet ordiner ek zot lofrann vezetal ek diven, zot ava osi ofer en bouk pour pardon zot pese.

²³ Katriyenm zour, zot ava ofer dis zenn toro, de mouton mal adilt ek 14 zenn mouton mal, enn an, tou san defo.

²⁴ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman.

²⁵ Anplis zot sakrifis konplet ordiner ek zot lofrann vezetal ek diven, zot ava osi ofer en bouk pour pardon zot pese.

²⁶ Senkyenm zour, zot ava ofer nef zenn toro, de mouton mal adilt ek 14 zenn mouton mal, enn an, zot tou san defo.

²⁷ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman.

²⁸ Anplis zot sakrifis konplet ordiner ek zot lofrann vezetal ek diven, zot ava osi ofer en bouk pour pardon zot pese.

²⁹ Sizyenm zour, zot ava ofer wit zenn toro, de mouton mal adilt ek 14 zenn mouton mal, enn an, zot tou san defo.

³⁰ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman.

³¹ Anplis zot sakrifis konplet ordiner, ek zot lofrann vezetal ek diven, zot ava osi ofer en bouk pour pardon zot pese.

³² Setyenm zour, zot ava ofer set zenn toro, de mouton mal adilt ek 14 zenn mouton mal, enn an, zot tou san defo.

³³ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven parey in ganny ordonnen.

³⁴ Anplis zot sakrifis konplet ordiner, ek zot lofrann vezetal ek diven, zot ava osi ofer en bouk pour pardon zot pese.

³⁵ Wityenm zour, zot ava konvok en dernyen rasanbleman sakre. Zot pa devre fer okenn travay sa zour.

³⁶ Zot ava ofer en sakrifis konplet ki donn en loder ki fer plezir SENYER: En toro, en mouton mal ek set zenn mouton mal, enn an, san defo.

³⁷ Zot ava osi ofer avek sakrifis bann toro, mouton mal, ek bann zenn mouton, lofrann vezetal ek diven dapre regleman.

³⁸ Anplis sa sakrifis konplet ordiner, ek zot lofrann vezetal ek diven, zot ava osi ofer en bouk pour pardon zot pese.

³⁹ Sa i bann regleman konsernan bann sakrifis konplet ordiner, lofrann vezetal ek lofrann diven ek bann sakrifis lakominyon ki zot ava ofer SENYER kan zot oule, oubyen pour akonpli en ve.

⁴⁰ Moiz ti dir pep Izrael tou sa ki SENYER ti'n ordonn li.