Nonm 28 - Labib An Kreol Seselwa

Bann Lofrann Ordiner

¹ SENYER ti dir Moiz:

² Donn sa bann lord pep Izrael: Dan letan fikse, zot ava ofer mon lofrann mon nouritir, brile par dife, ki donn loder ki fer mwan plezir.

³ Ou ava dir zot: La bann lofrann ki zot ava prezant devan SENYER: Tou le zour, de zenn mouton mal, aze enn e an san defo, koman en sakrifis konplet.

⁴ Ou ava ofer en zenn mouton bomaten e en lot zenn mouton, soley kouse.

⁵ Pour lofrann vezetal: En kilo lafarin melanze avek en lit delwil doliv pir.

⁶ Sa i zot lofrann ordiner ki ganny brile parey sa ki ti ganny ofer lo montanny Sinai: En sakrifis konplet ki donn en loder ki fer plezir SENYER.

⁷ Pour lofrann bomaten, ou ava ofer en lit diven ki ou ava vers lo lotel pour sak zenn mouton devan SENYER.

⁸ Ler soley i kouse, ou ava ofer lot zenn mouton avek menm lofrann delwil ek diven, parey bomaten. Sa i ava en lofrann brile par dife ki donn loder ki fer plezir SENYER.

Lofrann pour Saba

⁹ Zour saba, ofer de mouton mal, aze enn an e san defo, avek de kilo lafarin petri ansanm avek delwil e avek son lofrann diven.

¹⁰ Sa sakrifis konplet devret ganny ofer sak saba, an plis sakrifis ki zot ofer sak zour avek lofrann diven.

Lofrann pour Premye Zour Lemwan

¹¹ Lo konmansman sak mwan, zot ava ofer SENYER en sakrifis konplet: De toro, en mouton mal, set mouton enn an, san defo.

¹² An plis ki sa, pour sak toro, zot ava ofer en lofrann trwa kilo lafarin petri dan trwa lit delwil. Avek sa mouton mal, de kilo lafarin petri avek delwil.

¹³ Avek sak mouton, ofer en kilo lafarin petri avek delwil. Sa i pou en sakrifis konplet ki donn loder ki fer plezir SENYER.

¹⁴ Lofrann diven ki ganny verse kot lotel ava konmsa: De lit pour en toro; en lit edmi pour en mouton mal; en lit pour sak mouton. Sa i bann regleman pour bann sakrifis ofer konmansman sak mwan tou dilon lannen.

¹⁵ An plis ki sa bann sakrifis ordiner e bann lofrann diven, zot ava ofer en bouk pour pardon pese.

Lofrann pour Lafet Dipen san Lelven

¹⁶ Lafet Pak an loner SENYER devret ganny selebre katorzyenm zour premye mwan.

¹⁷ Son lannmen, kenzyenm zour sa premye mwan, zot ava fer en lafet. Zot ava manz dipen san lelven pandan set zour.

¹⁸ Son premye zour, zot ava fer en rasanbleman sakre: Sa zour, zot pa pou fer okenn travay.

¹⁹ Zot ava ofer SENYER en sakrifis konplet: De toro, en mouton mal ek set zenn mouton mal enn an, san okenn defo.

²⁰ Zot ava azout lafarin petri dan delwil, trwa kilo pour en toro, de kilo pour en mouton mal,

²¹ e en kilo pour sak mouton.

²² Zot ava ofer avek sa sakrifis en bouk pour pardon pese. Konmsa, rekonsilyasyon dan ou faver i ganny fer.

²³ Sa i ava en sakrifis an plis ki sakrifis ordiner pour tou le zour.

²⁴ Zot ava repet sa sakrifis tou le zour pandan sa set zour, en sakrifis konplet avek lofrann vezetal ki donn loder ki fer plezir SENYER.

²⁵ Setyenm zour, ou ava konvok en lasanble spirityel. Zot pa pou fer okenn travay sa zour.

Lofrann pour Lafet Rekolt

²⁶ Zour ki ou prezant lofrann premye rekolt sereal devan SENYER, konvok en rasanbleman sakre. Zot pa pou fer okenn travay sa zour.

²⁷ Zot ava ofer en sakrifis konplet ki fer plezir devan SENYER: De toro, en mouton mal ek set mouton enn an.

²⁸ Pour lofrann vezetal: Petri lafarin dan delwil: Nef kilo pour sak toro, sis kilo pour sak mouton mal,

²⁹ trwa kilo pour sak mouton enn an.

³⁰ Ofer osi en bouk pour rityel pardon ou pese.

³¹ Anplis, avek sa sakrifis konplet ek sereal tou le zour, ou ava ofer lofrann diven. Tousala devret san defo.