Nonm 27 - Labib An Kreol Seselwa

Bann Fiy Selofad

¹ Mala, Noa, Hogla, Milka ek Tirsa ti bann fiy Selofad, garson Efer, garson Galaad, garson Makir, garson Manase ek son klan, garson Zozef.

² Zot ti vin kot Moiz ek pret Eleazar. Tou bann sef tribi ek kominote Izrael ti la devan lantre Latant Rankont. Zot ti dir:

³ Nou papa in mor dan dezer; i pa ti parmi bann ki ti revolte kont SENYER dan group Kore. In mor avek son prop pese. I ti napa garson.

⁴ Eski non nou papa devret disparet dan son klan, zis akoz i ti napa garson? Donn nou alor, en par propriyete nou papa, parmi nou bann frer.

⁵ Moiz ti prezant zot ka devan SENYER.

⁶ SENYER ti koz avek Moiz:

⁷ Bann fiy Selofad i annan rezon. Donn zot par propriyete zot papa; en par parmi bann frer zot papa devre vin pour zot.

⁸ Dir sa osi avek pep Izrael: Kan en zonm i mor san les deryer li en garson, son fiy ava erit son byen.

⁹ Si i napa fiy, alor, donn son par son bann frer.

¹⁰ Si i napa frer, alor, ou ava donn son par frer son papa.

¹¹ Si son papa napa frer, alor ou ava donn son par enn son fanmir pli pros. Sa i pou en lalwa e en drwa pour bann Izraelit, parey SENYER in ordonn Moiz.

Zozye I Ganny Swazi koman Sikseser Moiz

¹² SENYER ti dir Moiz, “Mont lo montanny Abarim e get later ki mon'n donn bann Izraelit.

¹³ Apre sa, ou pou mor parey ou frer Aaron.

¹⁴ Annefe, zot tou le de, zot ti revolte kont mon lord dan dezer Sin. Kan lepep ti revolte kont mwan, ou pa ti fer konnen mon sentete devan zot.” Sa ti lo size sours delo Meriba, savedir rebel, ki sorti Kades dan dezer Sin.

¹⁵ Moiz ti priy SENYER,

¹⁶ “SENYER Bondye! Ou ki donn lavi tou sa ki ou'n kree, swazir en zonm pour diriz sa kominote

¹⁷ pour komann zot dan lager, pour ki ou pep pa egare parey bann mouton san berze.”

¹⁸ SENYER ti dir Moiz, “Pran Zozye, garson Noun, en zonm ki mon lespri i lo li. Enpoz ou lanmen lo son latet.

¹⁹ Prezant li devan pret Eleazar e devan kominote. La, devan zot tou, proklanm li koman ou sikseser.

²⁰ Donn li en par ou lotorite pour ki Izrael i obei li.

²¹ I pou asiste pret Eleazar ki ava konsilte Ourim. Konmsa, i ava diriz Zozye e lepep ava swiv.”

²² Moiz ti fer sa ki SENYER ti'n dir li. I ti prezant Zozye devan pret Eleazar e devan kominote antye.

²³ I ti enpoz lanmen lo latet Zozye e proklanm li koman son sikseser, parey SENYER ti'n dir par lentermedyer Moiz.