Nonm 25 - Labib An Kreol Seselwa

Pep Izrael I Ariv Peor

¹ Pandan ki pep Izrael ti'n enstal zot Sitim, zot ti tonm dan prostitisyon avek bann fanm Moabit.

² Sa bann fanm ti'n envit pep Izrael pour vin ofer sakrifis. Bann Izraelit ti manze e ador bann bondye Moab.

³ Konmsa, ki Izrael ti ador Baal-Peor e SENYER ti ankoler kont zot.

⁴ SENYER ti dir Moiz, “Pran tou bann sef Izrael, pann zot devan SENYER an fas avek soley. Apre, sa gran lakoler SENYER ava tonbe.”

⁵ Moiz ti dir bann ziz Izrael, “Zot tou, zot pou bezwen touy sa bann dimoun dan zot tribi ki'n al kot Baal-Peor.”

⁶ Dan sa moman, pandan ki zot ti pe plere devan lantre Latant Rankont SENYER, en zonm Izraelit ti antre dan kan avek en fanm Madyanit devan Moiz e devan kominote Izraelit.

⁷ Ler Fineas, garson Eleazar, garson pret Aaron ti war sa, i ti leve dan milye kominote; i ti pran en lans,

⁸ swiv sa zonm ziska dan son latant e pers sa Izraelit ek sa fanm dan bavant. Apre sa, fleo ti arete parmi pep Izrael.

⁹ Sa fleo ti'n fer deza 24,000 mor.

¹⁰ SENYER ti dir Moiz,

¹¹ “Fineas, garson Eleazar, garson Gran-Pret Aaron in apez mon lakoler par sa ki i'n fer. I ti zalou parey mwan e mon pa'n detri zot dan mon lakoler.

¹² Dir li alor, ki mon fer en lalyans lape avek li.

¹³ Sa lalyans ava pour li ek son desandans. Sa lalyans pou etabli zot pret pour touzour, akoz i'n montre en pasyon zalou pour son Bondye e i'n fer rekonsilyasyon pour Izrael ganny pardonnen.”

¹⁴ Sa zonm ki ti ganny pike ansanm avek sa fanm Madyanit, ti apel Zimri, garson Salou. I ti en sef fanmir dan tribi Simeon.

¹⁵ Sa fanm ki ti ganny touye ti apel Kozbi, fiy Sour, en sef dan tribi bann Madyanit.

¹⁶ SENYER ti dir Moiz,

¹⁷ “Atak bann Madyanit e detri zot tou,

¹⁸ akoz ditor ki zot in fer ou dan zafer Peor e dan zafer Kozbi, fiy en responsab bann Madyanit. Zot ser ki ti ganny touye zour fleo akoz zafer Peor.”