Nonm 24 - Labib An Kreol Seselwa

¹ Balaanm ti'n fini konpran ki SENYER in trouv bon beni Izrael. Alor, i pa ti al rod rekour dan pratik mazik parey avan. I ti tourn dan direksyon dezer.

² I ti lev son lizye e war Izrael pe kanpe par tribi. Lespri Bondye ti sezi li.

³ I ti pronons sa profesi: Parol Balaanm, garson Peor; parol en zonm ki war kler.

⁴ Parol sa enn ki antann Parol Bondye e war vizyon Bondye Toupwisan.

⁵ Zakob! Ou bann latant, Ou bann abitasyon ek ou demer i zoli, Izrael!

⁶ Zot parey bann long ranze palmye obor larivyer parey bann aloes ki SENYER in plante, parey pye sed obor delo.

⁷ Zot pou ganny bokou delo. Zot lagrenn pou ganny semen dan laplenn e ganny byen aroze. Bann lerwa Izrael pou pli gran ki Agag, zot rwayonm pou agrandi.

⁸ Bondye in fer zot sorti Lezip; i annan lafors en toro sovaz. I ti devor bann nasyon lennmi; kraz zot lezo e atak zot avek bann fles.

⁹ I alonze ater parey en lyon; i dormi parey en femel lyon. Lekel ki kapab fer li leve? Sa enn ki beni li ava ganny beni; sa enn ki modi li ava ganny modi.

¹⁰ Balak ti ankoler kont Balaanm. I ti tap dan son lanmen e dir li, “Mon ti apel ou isi pour modi mon bann lenn-mi. La i fer trwa fwa ki ou beni zot.

¹¹ Aprezan, degaze, retourn kot ou. Mon ti'n promet pour rekonpans ou, me SENYER in anpes ou ganny sa rekonpans.”

¹² Balaanm ti reponn li, “Pa mon ti dir ou bann mesaze ki ti vin rod mwan:

¹³ Menm si Balak i donn mwan tou son larzan, ek tou lor dan son pale, mon pa pou kapab lo mwan menm, fer ni dibyen, ni dimal; mon pou repet zis parol ki SENYER i dir mwan.”

Dernyen Parol Balaanm

¹⁴ Balaanm ti dir Balak, “Aprezan, mon pe ale. Vini, mon ava dir ou sa ki sa pep pou fer avek ou pep dan lavenir.”

¹⁵ Balaanm ti pronons sa poenm: Parol Balaanm, garson Peor, parol en zonm ki war lwen.

¹⁶ Parol en zonm ki antann Parol Bondye, ki konn plan Bondye Toupwisan, ki war sa ki Bondye i montre li, ki prosternen e ki war vizyon.

¹⁷ Mon war dan lavenir, mon gete, me ankor dan lwen. En zetwal pou sorti dan Zakob, en lerwa pou leve sorti dan Izrael. I pou tap Moab dan son latanp, e kraz latet bann desandan Set.

¹⁸ I pou ganny laviktwar lo Edonm e pran posesyon zot teritwar. Izrael i montre son lafors.

¹⁹ En sef pou sorti dan fanmir Zakob i pou detri tou sa ki reste dan lavil.

Balaanm I Anons Larin bann Lennmi Izrael

²⁰ Dan son vizyon, Balaanm ti war bann Amalesit. I ti fer son prediksyon: Amalek i nasyon pli pwisan. Me finalman, i pou ganny detri.

²¹ Balaanm ti osi war bann Kenit. I ti fer son prediksyon: Zot pli solid e an sekirite; zot nik in ganny poze lo ros.

²² Me Kaen pou ganny detri par dife. Bann Asiriyen pou fer zot prizonnyen.

²³ Balaanm ti kontinyen: Maler! Lekel ki pou sirviv aksyon Bondye?

²⁴ Bann anvaiser pour sorti Sip. Zot pou imilye bann Asiriyen ek fanmir Heber. Li osi pou ganny detri pour touzour.

²⁵ Balaanm ti leve e retourn kot li. Balak osi ti retourn kot li.