Nonm 22 - Labib An Kreol Seselwa

Lerwa Moab I Anvoy Balaanm

¹ Pep Izrael ti al kanp dan laplenn Moab, kote Les larivyer Zourden, vizavi Zeriko.

² Balak, lerwa Moab, garson Sipor, ti'n war sa ki pep Izrael ti'n fer avek bann Amorit.

³ Moab ti per kan i ti war sa pep avek en si gran kantite dimoun.

⁴ I ti dir bann sef Madyann: Sa pep pou devor tou sa ki otour nou, parey en bef ki manz tou zerb dan laplenn. Sa lepok, Balak, garson Sipor, ti lerwa Moab. Alor, lerwa Balak

⁵ ti anvoy bann mesaze kot Balaanm, garson Beor, ki ti pe reste Petor obor larivyer Efrat, pour dir li: I annan en pep ki sorti Lezip. Zot kouver pei antye e zot reste vizavi avek mwan.

⁶ Vini e modi zot pour mwan, akoz zot pli for ki mwan. Petet mon ava kapab bat zot e pous zot lwen avek mon pei. Mon konnen ki sa ki ou beni, i ganny beni; sa ki ou modi, i ganny modi.

⁷ Bann sef Moab ek bann sef Madyanit ti anmenn kado pour Balaanm. Ler zot ti ariv kot Balaanm, zot ti donn li mesaz sorti kot Balak.

⁸ Balaanm ti dir zot: Pas lannwit isi; demen mon ava donn zot en larepons dapre parol ki SENYER ava dir mwan. Alor, bann sef Moab ti pas lannwit kot Balaanm.

⁹ Bondye ti vin kot Balaanm e demann li, “Lekel sa bann zonm ki kot ou?”

¹⁰ Balaanm ti reponn Bondye, “Balak, garson Sipor, lerwa Moab, in anvoy zot avek mesaz pour dir mwan:

¹¹ En pep ki sorti Lezip i kouver pei antye. I oule mon vini pour modi sa pep, pour li ganny laviktwar e sas zot lwen avek son teritwar.”

¹² Bondye ti dir Balaanm, “Ou pa pou al avek zot. Ou pa pou modi sa pep, akoz i en pep beni.”

¹³ Balaanm ti leve lannmen bomaten. I ti dir avek bann mesaze Balak, “Ale, retourn kot zot. SENYER in refize les mwan al avek zot.”

¹⁴ Alor, zot ti retourn kot Balak. Zot ti dir li, “Balaanm in refize vin avek nou.”

¹⁵ Balak ti anvoy en pli gran delegasyon bann sef pli enportan ki avan.

¹⁶ Ler zot ti ariv kot Balaanm, zot ti dir li, “La sa ki Balak, garson Sipor i dir: Pa les nanryen anpes ou vin kot mwan.

¹⁷ Mon pou byen rekonpans ou. Mon ava fer tou sa ki ou dir mwan fer. Vin modi sa pep pour mwan.”

¹⁸ Balaanm ti reponn bann serviter Balak, “Menm si Balak ti pou donn mwan tou son lor ek son larzan, mon pa pou kapab fer nanryen kont lord SENYER, mon Bondye.

¹⁹ Me zot, pas lannwit isi. Mon ava konnen si SENYER i annan ankor keksoz pour li dir mwan.”

²⁰ Dan lannwit, Bondye ti vin kot Balaanm. I ti dir li, “Si sa bann zonm in vin apel ou, leve, al avek zot; me fer zis sa ki mwan, mon dir ou fer.”

²¹ Alor, son lannmen bomaten, Balaanm ti leve. I ti sel son bourik e al avek bann sef Moab.

Balaanm ek Son Bourik

²² Bondye ti ankoler akoz Balaanm ti'n ale. Dan semen, pandan ki i ti pe ale lo son bourik, akonpannyen par de serviter, lanz SENYER ti debout dan milye semen pour bar son semen.

²³ Bourik ti war lanz SENYER debout lo semen avek en lepe dan son lanmen. Alor, i ti kit semen pour al dan laplenn. Balaanm ti bat son bourik pour fer li retourn lo semen.

²⁴ Apre sa, lanz SENYER ti pozisyonn li dan en semen etrwat dan plantasyon rezen kot ti annan en miray lo sak kote.

²⁵ Ler bourik ti war lanz SENYER, i ti koste avek miray. Lipye Balaanm ti kwense kont miray e Balaanm ti fwet son bourik ankor.

²⁶ Lanz SENYER ti al devan zot. I ti plas li dan en landrwa etrwat kot i ti enposib tourn ni adrwat ni agos.

²⁷ Bourik ti war lanz SENYER. I ti afese anba Balaanm e tonm ater. Balaanm ti pran lakoler e i ti bat son bourik avek son baton.

²⁸ Alor, SENYER ti ouver labous bourik e fer li koze. I ti dir Balaanm, “Ki mon'n fer ou pour ou bat mwan? Sa i fer deza trwa fwa?”

²⁹ Balaanm ti reponn bourik, “Akoz ou'n foud mwan? Si mon ti annan en lepe dan mon lanmen, mon ti'n fini touy ou.”

³⁰ Bourik ti reponn li, “Eski mon pa sa menm bourik ki ou abitye monte tou ou lavi ziska ozordi. Eski i mon labitid fer konmsa anver ou?” I ti reponn, “Non.”

³¹ SENYER ti ouver lizye Balaanm. I ti war lanz SENYER debout dan semen avek son lepe dan lanmen. I ti prosternen lafas ater.

³² Lanz SENYER ti demann li, “Akoz ou'n bat ou bourik? La i fer trwa fwa. Mon'n vin pour anpes ou fer sa vwayaz, akoz sa semen pou anmenn maler lo ou.

³³ Ou bourik in war mwan trwa fwa. Si i pa ti'n sanz semen, mon ti'n fini touy ou e les ou bourik vivan.”

³⁴ Balaanm ti reponn lanz SENYER, “Mon'n fer pese; mon pa ti konnen ki ou ti dan semen devan mwan. Aprezan, si ou pa kontan, mon ava retourn kot mwan.”

³⁵ Me lanz SENYER ti dir li, “Non, al avek zot. Me ou ava repet zis parol ki mon ava dir ou.” Balaanm ti kontiny son semen avek bann sef Balak.

Balak I Akey Balaanm

³⁶ Kan Balak ti tande ki Balaanm pe vini, i ti al rankontre li ziska lavil Moab ki obor larivyer Arnon, ki lo frontyer son teritwar.

³⁷ Balak ti dir Balaanm, “Akoz ou pa ti vini ler mon ti anvoy sers ou premye fwa? Ou krwar mon pa ase ris pou rekonpans ou?”

³⁸ Balaanm ti dir li, “Mon'n vin kot ou. Me pa krwar mon kapab dir nenport kwa. Mon pou repet zis parol ki Bondye ava met dan mon labous.”

³⁹ Alor, Balaanm ti al avek Balak e zot ti ariv Kiryat-Housot.

⁴⁰ Balak ti ofer en sakrifis bef ek mouton e partaz avek Balaanm ek sa bann sef ki ti la.

⁴¹ Lannmen bomaten, Balak ti pran Balaanm e mont avek li ziska Bamot-Baal kot i ti war selman en parti pep Izrael.