Nonm 19 - Labib An Kreol Seselwa

Lasann Bef Rouz

¹ SENYER ti dir Moiz ek Aaron:

² Sa i lalwa ki SENYER ti donnen: Dir pep Izrael anmenn devan ou en bef rouz ki napa okenn defo e ki pa ankor anmenn okenn fardo.

³ Ou ava donn sa bef pret Eleazar. Zot ava anmenn li an deor kan, kot i ava ganny egorze dan prezans Eleazar.

⁴ Pret Eleazar ava pran en pe son disan avek son ledwa e asperz set fwa dan direksyon lantre Latant Rankont SENYER.

⁵ Answit, sa bef ava ganny brile antye devan li avek son lapo, son lavyann, son disan ek tou son zentesten.

⁶ Pret ava pran dibwa sed, izop ek en riban rouz e zet tousala dan dife kot sa bef pe brile.

⁷ Pret ava lav son lenz e pran en ben dan delo; apre, i ava antre dan kan. Me i pou reste enpir ziska aswar.

⁸ Sa enn ki'n bril sa bef i ava osi lav son lenz e pran en ben dan delo; i pou reste enpir ziska aswar.

⁹ En zonm ki pir, ava ranmas lasann sa bef e depoz li dan en landrwa pir, an deor kan. Pep Izrael ava servi sa lasann pour pirifye delo ki pou servi pour pirifikasyon. Sa i ava en sakrifis pour pardon pese.

¹⁰ Sa zonm ki ranmas lasann sa bef ava osi lav son lenz; me i pou reste enpir ziska aswar. Sa i en regleman pour tou zenerasyon pour touzour, menm pour bann etranze ki reste parmi zot.

Kontak avek Lekor Mor

¹¹ En dimoun ki tous nenport lekor mor, pou reste enpir pandan set zour.

¹² I pou bezwen pirifye li avek delo pirifikasyon lo trwazyenm zour e lo setyenm zour. Si i pa fer pirifikasyon lo trwazyenm zour, i pa pou pir lo setyenm zour.

¹³ En dimoun ki tous en kadav e ki pa ganny pirifye, pou rann tanp SENYER enpir. I devret ganny met an deor kominote pep Izrael, akoz i pa'n vers delo pirifikasyon lo li. I pou reste dan son leta enpir.

¹⁴ La en lot lalwa: Ler en dimoun i mor dan en latant, dimoun ki antre dan sa latant, pou vin enpir pandan set zour, parey sa bann ki ti dan sa latant.

¹⁵ Tou bann resipyan ouver e ki napa en kouvertir sere lo la dan latant, pou osi vin enpir.

¹⁶ Si en dimoun i dan laplenn e i tous lekor en zonm ki'n ganny touye oubyen ki'n mor en lanmor natirel, si i tous kadav en dimoun mor oubyen en latonm, i pou reste enpir pandan set zour.

¹⁷ Pour pirifye li, zot ava pran lasann ki dan brazye sakrifis pour pese, met dan en resipyan e vers delo larivyer ladan.

¹⁸ En dimoun ki pir, ava pran en brans izop, tranp li dan sa delo e fer aspersyon lo latant, lo tou bann resipyan, lo tou dimoun ki la, lo sa enn ki'n tous sa kadav, e osi swa lo sa zonm ki'n ganny touye, swa lo sa lekor mor, ou swa sa latonm.

¹⁹ Lo trwazyenm zour e lo setyenm zour, sa enn ki pir ava fer laspersyon delo lo sa bann dimoun ki enpir. Zot pou ganny pirifye lo setyenm zour. Apre, i ava lav son lenz ek son lekor dan delo e aswar, i ava vin pir.

²⁰ Dimoun ki vin enpir e ki pa fer rityel pirifikasyon, pou ganny met deor kominote Izrael. Annefe, zot pou rann Latant SENYER enpir, akoz zot pa'n ganny asperze avek delo pirifikasyon; zot pou reste enpir.

²¹ Sa lalwa i valab pour touzour. Sa dimoun ki pe fer aspersyon delo pirifikasyon ava lav son lenz. Alor, dimoun ki tous delo pirifikasyon pou vin enpir ziska aswar.

²² Tou keksoz ki en dimoun enpir i touse pou vin enpir. Tou dimoun ki i touse pou vin enpir ziska aswar.