Nonm 18 - Labib An Kreol Seselwa

Responsabilite Pret ek Levit

¹ SENYER ti dir Aaron: Ou, ou bann garson, ansanm avek ou fanmir, zot tou, zot pou responsab pese ki ganny komet anver sanktyer. Me zis ou ek ou bann garson, ki pou responsab sa bann fot ki ganny komet dan zot servis koman pret.

² Anmenn osi avek ou, ou bann frer ki sorti dan tribi Levi, tribi ou papa, pour ki zot servi ou ler ou ek ou bann garson pe ofisye devan Latant.

³ Zot ava pran zot responsabilite anver ou dan servis Latant. Me zot pa devre apros obor okenn lobze sakre dan sanktyer, oubyen lotel, sankwa zot pou mor, e ou, ansanm avek zot.

⁴ Zot pou travay avek ou e desarz zot responsabilite dan Latant Rankont SENYER. Okenn lezot dimoun napa drwa asiste ou.

⁵ Zis zot ki devre ofisye dan sanktyer e lo lotel. Konmsa mon lakoler pa ava tonm ankor lo pep Izrael.

⁶ Mwan, mon'n swazir ou frer bann Levit parmi bann tribi Izrael. Zot en don ki mon fer ou; zot ava pour SENYER pour ofer servis dan Latant Rankont SENYER.

⁷ Mon'n swazir ou ek ou bann garson pour fer servis dan sanktyer, lo lotel e deryer rido. Mon donn zot responsabilite pret. Sa enn ki apros sanktyer pou ganny met anmor.

Par bann Pret

⁸ SENYER ti dir Aaron: Mon donn ou tou lofrann ki pep Izrael i anmennen. Mon donn ou tou sa bann lofrann koman en par e pour ou desandan pour touzour.

⁹ La sa ki mon'n donn ou parmi bann lofrann sakre ki pa'n ganny ofer pour ganny brile: Tou zot bann don, zot bann lofrann vezetal; tou sakrifis pour pese, zot sakrifis pour reparasyon zot pese. Tousala i sakre, tou sa bann lofrann i pour ou e pour ou bann garson.

¹⁰ Zot ava manz tousala koman bann keksoz sakre. Tou bann zonm ava kapab manze, zot ava sakre pour ou.

¹¹ La ankor sa ki mon donn ou: Tou lofrann spesyal ki ganny ofer par lepep i pour ou, pour ou bann garson e ou bann fiy pour touzour. Tou manm ou fanmir, ou bann garson ek fiy ki pir ava kapab manze.

¹² Mon donn ou prodwi ki zot ofer SENYER: Meyer delwil, meyer diven ek dible.

¹³ Tou lofrann premye rekolt ki ganny anmennen kot SENYER i vin pour ou. Tou manm dan ou fanmir ava kapab manze.

¹⁴ Tou don ki ganny ofer i vin pour ou.

¹⁵ Anfen, tou premye ne ki ganny ofer SENYER, dimoun ouswa zannimo i vin pour ou, me ou bezwen aksepte zis pri larzan pour bann premye ne imen ek zannimo enpir ki'n ganny aste.

¹⁶ Zot devret ganny aste ler zot annan en mwan, dapre pri ki ava ganny fikse: Senk pyes larzan dapre valer larzan sanktyer, ki pez 10 granm.

¹⁷ Me ou pa pou kapab aste premye porte en bef, en mouton oubyen en kabri, akoz zot sakre. Ou ava vers zot disan lo lotel, bril zot lagres e bril zot karkas koman en sakrifis lo lotel; i pou en loder ki fer plezir SENYER.

¹⁸ Gard pour ou, lavyann en zannimo ki'n ganny ofer, son pwatrin ek son lazanm deryer kote drwat.

¹⁹ Mon donn ou, ou bann garson ek ou bann fiy tou sa bann lofrann ki pep Izrael i ofer devan SENYER. I ou drwa pour touzour; i dan kondisyon lalyans konsakre avek disel fer avek ou e tou ou bann desandan pour touzour.

²⁰ SENYER ti dir Aaron: Ou pou napa par, ni patrimwann parmi pep Izrael. Mwan ki ou par e ou patrimwann parmi pep Izrael.

Par bann Levit

²¹ SENYER ti kontinyen: Mon donn bann Levit tou ladim ki lepep i ofer mwan. Sa i zot par pour servis dan Latant Rankont SENYER.

²² Apartir ozordi, bann Izraelit pa devre apros Latant Rankont SENYER, san ki zot rann zot koupab e pangar zot mor.

²³ Zis bann Levit ki annan drwa fer servis dan Latant Rankont SENYER. Zot ava responsab pour zot pese. Sa i en lalwa ki zot ek zot desandan pou bezwen garde pour touzour.

²⁴ Mon donn bann levit tou ladim ki pep Izrael i anmenn pour SENYER. Mon donn zot sa koman patrimwann. Pour sa rezon, mon dir ki zot pa pou posed okenn propriyete parmi pep Izrael.

Ladim bann Levit

²⁵ SENYER ti dir Moiz:

²⁶ Ou ava osi dir bann levit: Ler zot resevwar ladim ki SENYER in donn zot sorti kot pep Izrael, pran en dizyenm sa ladim e ofer SENYER.

²⁷ Sa i pou vin zot lofrann, parey i ganny pran lo sereal ler pe bate ek rezen ler pe kraze.

²⁸ Dan sa fason, zot ava kapab osi prezant en lofrann spesyal devan SENYER lo tou ladim ki zot in gannyen sorti kot pep Izrael. Sa lofrann pou vin pour pret Aaron, sorti kot SENYER.

²⁹ Lo tou bann don ki ganny prezante, ou ava swazir meyer parti. I ava ganny konsakre pour SENYER.

³⁰ Sa ki reste ava vin pour bann levit. Zot ava gard sa ki reste parey dan ka prodwi sereal ler pe bate ek diven ler rezen pe ganny kraze.

³¹ Zot kapab manz li dan nenport landrwa avek zot fanmir, akoz i zot saler an retour pour zot servis dan Latant Rankont SENYER.

³² Kan zot ava'n met dekote meyer porsyon pour mwan, zot pa pou koupab pour okenn pese. Zot pa ava pe profann bann lofrann sakre pep Izrael. Zot pa pou mor.