Nonm 14 - Labib An Kreol Seselwa

Pep Izrael I Konplent

¹ Tou lannwit, kominote Izraelit ti lev lavwa e plere dan detres.

² Lepep antye ti konplent kont Moiz ek Aaron. Zot tou, zot ti dir: Plito nou ti'n mor Lezip; plito nou ti'n mor dan sa dezer!

³ Akoz SENYER i anvi fer nou antre dan sa pei, si nou bezwen ganny masakre? Nou bann zanfan ek nou fanm pou ganny pran otaz! Pa ti ava preferab pour nou retourn Lezip?

⁴ Alor, zot ti dir ant zot: Annou rod en sef e nou ava retourn Lezip.

⁵ Moiz ek Aaron ti tonm lafas ater devan pep Izrael antye ki ti'n rasanble.

⁶ Parmi bann ki ti'n al eksplor pei, Zozye, garson Noun ek Kaleb, Garson Yefoune, ti desir zot lenz.

⁷ Zot ti koz avek pep Izrael: Sa pei ki nou'n al eksplore i vreman en tre bon pei.

⁸ Si SENYER i bon anver nou, i pou anmenn nou laba e donn nou sa pei kot i koul dile ek dimyel.

⁹ Selman, pa revolte kont SENYER e pa per bann zabitan sa pei. Nou pou bat zot en sel kou. SENYER i avek nou, zot nepli annan proteksyon. Alor, pa bezwen per zot.

¹⁰ Kominote Izrael ti pe menase pour saboul zot avek ros, me en sel kou, laglwar SENYER ti aparet kot Latant, devan pep Izrael.

Moiz I Pled pour Pep Izrael

¹¹ SENYER ti dir Moiz, “Pour konbyen letan ankor sa pep pou rezet mwan? Pour konbyen letan ankor zot pou refize krwar dan mwan, malgre tou sa bann siny ki mon'n fer parmi zot?

¹² Mon pou detri zot par en lepidemi e dezerit zot. Mon pou fer sorti dan ou en gran nasyon pli gran e pli for ki zot.”

¹³ Moiz ti dir SENYER, “Bann Ezipsyen in konnen ki ou'n fer sorti sa pep Lezip avek ou pwisans.

¹⁴ Zot in rakont avek zabitan sa pei; sa bann dimoun in tande ki ou SENYER, ou parmi ou pep, ki ou SENYER ou aparet fas a fas. Ou dan nyaz par lao latant. Ou diriz zot dan en kolonn nyaz lizour e dan en kolonn dife aswar.

¹⁵ Si aprezan, ou detri sa pep en sel kou, bann nasyon ki'n antann koz lo ou, pou dir:

¹⁶ SENYER pa'n kapab anmenn sa pep dan pei ki i ti'n promet zot. Alor in touy zot dan dezer.

¹⁷ Aprezan, SENYER, mon sipliy ou! Montre ou gran pwisans parey ou'n promet ler ou ti dir:

¹⁸ Mwan SENYER, mon pasyan, ranpli avek labonte ek fidelite, ki pardonn fot ek pese. Me mon pa fer koupab pas pou inosan. Mon azir kont sa enn ki'n komet pese e kont son bann desandan, ziska trwazyenm e menm katriyenm zenerasyon.

¹⁹ Alor, pardonn fot sa pep dapre ou gran fidelite, parey ou'n pardonn zot depi zot in kit Lezip.”

²⁰ SENYER ti reponn, “Mon pardonn zot parey ou'n demande.

²¹ Me osi vre ki mon vivan, e ki later antye i ranpli avek laglwar SENYER,

²² tou sa bann ki'n war mon laglwar ek bann siny ki mon'n fer dan Lezip e dan dezer, ki'n provok mwan deza dis fwa e ki pa'n obeir mwan,

²³ mon promet ki personn parmi zot pa pou war sa pei ki mon ti promet zot zanset par en serman.

²⁴ Me akoz mon serviter Kaleb ki ti annan en lot lespri, ki'n reste tre fidel anver mwan, mon pou anmenn li dan sa pei ki i'n al eksplore. I ava pran posesyon sa later osi byen ki son desandan.

²⁵ Bann Amalesit ek bann Kananeen pe reste dan bann vale. Demen, zot ava tourn ver dezer dan direksyon lanmer Rouz.”

Pinisyon Lepep akoz Zot Konplent

²⁶ SENYER ti dir Moiz ek Aaron:

²⁷ Pour konbyen letan ankor mon pou siport konplent sa move kominote? Mon'n antann bann Izraelit pe proteste kont mwan.

²⁸ Dir zot: Mwan SENYER ki deklare: Osi vre ki mon vivan, mon pou tret zot parey mon'n antann zot dir:

²⁹ Zot ki'n ganny resanse, ki aze depi laz 20 an, an montan, zot ki'n konplent kont mwan, zot kadav pou tonbe partou dan sa dezer.

³⁰ Personn pa pou antre dan sa pei ki mon ti promet pour enstal zot, eksepte Kaleb ek Zozye, garson Noun.

³¹ Kanta zot zanfan, ki zot ti dir pou vin bann otaz, mon pou fer zot antre e zot pou konn sa pei ki zot pa ti oule.

³² Kanta zot, zot pou mor isi dan sa dezer.

³³ Zot zanfan pou viv lavi berze pandan 40 an. Zot pou sibir konsekans zot enfidelite, ziska ki sa enn dernyen i mor.

³⁴ Zot pou soufer konsekans zot pese pandan 40 an, en lannen pour sak zour ki zot ti eksplor sa pei. Zot ava konn mon mekontantman.

³⁵ Mwan SENYER, mon promet ki mon pou fer sa ki mon'n dir avek sa move kominote ki'n revolte kont mwan. Zot tou, zot pou tonbe e mor isi dan sa dezer.

³⁶ Bann zonm ki Moiz ti'n anvoy eksplor pei e ki ti fer lepep konplent kont SENYER par zot move rapor,

³⁷ ti ganny pini avek en fleo: Zot ti mor devan SENYER.

³⁸ Zis Zozye, garson Noun ek Kaleb, garson Zefoune, ki ti reste vivan parmi sa bann ki ti al eksplor pei.

Pep Izrael I Kontinyen Dezobei

³⁹ Kan Moiz ti anons sa avek pep Izraelit antye, zot ti tonm dan en gran dezolasyon.

⁴⁰ Lannmen, zot ti lev granmaten e mont ver latet montanny. Zot ti dir, “Aprezan, nou pou antre dan later ki Bondye in promet. Nou rekonnet ki nou'n fer pese.”

⁴¹ Moiz ti dir zot, “Akoz zot pe dezobei lord ki SENYER in donnen? Sa pa pou reisi.

⁴² Pa bezwen monte, akoz SENYER pa avek zot. Pa les zot ganny bate par zot bann lennmi.

⁴³ La bann Amalesit ek bann Kananeen i devan zot. Zot pou ganny masakre akoz zot in abandonn SENYER. SENYER pa pou avek zot.”

⁴⁴ Zot ti persiste pour mont dan sa rezyon montanny menm si Kof Lalyans SENYER ek Moiz pa ti'n kit kan.

⁴⁵ Alor, bann Amalesit ek bann Kananeen ki ti pe reste dan sa bann montanny ti atak zot. Zot ti ganny bate e ganny masakre. Zot ti sov ziska Horma.