Nehemi 9 - Labib An Kreol Seselwa

Lepep I Konfes Son Pese

¹ Dan sa menm mwan, vennkatriyenm zour, pep Izrael ti rasanble ansanm pour zene. Zot ti met lenz dey, avek lapousyer lo zot latet.

² Bann ki desandan Izrael ti separ zot avek bann etranze. Zot ti debout e konfes zot pese ek pese zot bann zanset.

³ Pandan ki zot ti debout la dan zot plas, liv lalwa SENYER, zot Bondye, ti ganny lir pandan en kar lazournen; pandan en lot kar lazournen zot ti konfes zot pese e ador SENYER, zot Bondye.

⁴ Zozye, Bani, Kadmyel, Sebanya, Bouni, Serebya, Bani, ek Kenanni, ti mont lo lestrad bann Levit e kriye aotvwa ver SENYER, zot Bondye.

⁵ Bann levit Zozye, Kadmyel, Hasabneya, Serebya, Odiya, Sebanya, ek Petahya, ti dir: Leve, remersye SENYER, zot Bondye! Remersye li depi touzour e pour touzour! Ou non glorye ki depas tou benediksyon e tou louanz i ganny beni!

Lapriyer Solannel

⁶ Zis ou, SENYER, zis ou ki'n fer lesyel, lesyel ki par lao lesyel, e tou sa ki i annan, later avek tou sa ki i kontenir, lanmer e tou sa ki ladan. Ou donn zot tou lavi. Liniver antye i ador ou.

⁷ Ou menm SENYER, Bondye, ki ti swazir Abranm, ki ti fer li sorti Our, dan pei bann Kaldeen. I ti donn li non Abrahanm.

⁸ Ou ti war son leker senser anver ou; ou ti fer en lalyans avek li pour donn son desandans pei bann Kananeen, bann Hitit, bann Amorit, bann Perizit, bann Zebizit ek bann Girgasit. Ou'n gard ou promes, akoz ou zis.

⁹ Ou ti war soufrans nou bann zanset dan Lezip; ou ti antann zot kriye lo bor lanmer Rouz.

¹⁰ Ou ti fer bann siny ek bann mervey kont Faraon, kont tou son bann serviter ek tou zabitan son pei, akoz ou ti konnen ki zot ti ensolan anver nou bann zanset. Ou'n fer ou renonmen ziska ozordi.

¹¹ Ou ti ouver lanmer devan zot; zot ti travers lanmer lo later sek. Me bann ki ti pe pourswiv zot, ou ti anglouti dan profonder, parey en ros ki tonm dan fon lanmer.

¹² Ou ti gid zot pandan lazournen par en kolonn nyaz, aswar par en kolonn dife pour ekler semen ki zot devre swiv.

¹³ Ou ti osi desann lo montanny Sinai. Depi lesyel, ou ti koz avek zot; ou ti donn zot bann regleman drwat, bann lalwa vre, bann lalwa ek bann komannman parfe.

¹⁴ Ou'n fer zot konn ou saba sakre e par lentermedyer Moiz, ou serviter, ou'n ansenny zot ou bann komannman, regleman ek lalwa.

¹⁵ Kan zot ti lafen, ou ti donn zot dipen sorti dan lesyel; kan zot ti swaf, ou ti fer delo sorti dan ros, e ou ti dir zot al pran posesyon sa pei ki ou ti fer serman, pour donn zot.

¹⁶ Me nou bann zanset ti arogan e zot ti revolte. Zot pa ti obei ou bann komannman.

¹⁷ Zot ti refize obei e zot ti oubliy bann mervey ki ou ti fer parmi zot. Zot ti revolte e dan zot revolt, zot ti swazir en sef pour retourn dan zot lesklavaz Lezip. Me ou en Bondye ki pare pour pardonnen; ou bon, ou annan konpasyon, pasyans, gran fidelite, e ou pa ti abandonn zot,

¹⁸ menm kan zot ti fabrik en zenn bef fonn dan metal. Zot ti dir: La zot Bondye ki ti fer zot sorti Lezip! Sa mannyer fer, ti en gran lensilt kont ou.

¹⁹ Dan ou gran konpasyon, ou pa ti abandonn zot dan dezer. Kolonn nyaz, pa ti arete gid zot pandan lazournen, ni kolonn dife aswar, ki ti kler semen ki zot ti devre swiv.

²⁰ Dan ou bonte, ou ti donn zot ou lespri pour ansenny zot. Ou pa ti refize fourni zot lamann pour manze; ou ti donn zot delo kan zot ti swaf.

²¹ Pandan 40 an ou'n pran swen avek zot e zot pa ti mank nanryen dan dezer. Zot lenz pa ti ize e zot lipye pa ti anfle.

²² Ou ti donn zot bann rwayonm e livre zot, bann pep; ou ti donn zot bann teritwar vwazen. Konmsa, zot ti pran posesyon pei bann lerwa Sionn, Hesbonn e pei Og, lerwa Basann.

²³ Ou ti ogmant zot desandan parey zetwal dan lesyel; ou ti anmenn zot dan sa pei ki ou ti dir zot bann zanset antre pour pran posesyon.

²⁴ Alor, zot bann desandan ti antre e pran posesyon sa pei. Ou ti livre dan zot lanmen bann Kananeen, zabitan sa pei, avek zot bann lerwa, pour tret zot mannyer zot ti anvi.

²⁵ Zot ti pran bann lavil fortifye ek en later fertil; zot ti pran bann lakaz ranpli avek toudsort byen, bann sitern ki'n fini ganny fouye, bann plantasyon rezen, zoliv ek en kantite pye fri. Zot ti manze ziska rasazye, angrese. Gras ou gran bonte, zot in viv dan lopilans.

²⁶ Me, zot ti dezobeisan e revolte kont ou. Zot ti tourn zot ledo avek ou lalwa e touy ou bann profet ki ti averti zot, pour zot retourn kot ou. Zot ti ensilte ou gravman.

²⁷ Alor, ou ti livre zot dan lanmen zot bann lennmi ki ti fer zot soufer. Me dan zot maler, zot ti kriy ver ou; depi lesyel, ou ti antann zot; dan ou gran bonte, ou ti donn zot bann sover ki ti delivre zot dan lanmen zot bann lennmi.

²⁸ Me, deswit apre ki zot ti'n ganny en pe repo, zot ti rekonmans fer sa ki mal devan ou. Alor, ou ti abandonn zot dan lanmen zot bann lennmi, ki ti domin lo zot. Me ler zot ti kriy ver ou ankor, depi lesyel, ou ti antann zot. Dan ou gran konpasyon, ou ti delivre zot plizyer fwa.

²⁹ Ou ti sipliy zot ankor, pour obeir ou lalwa. Me zot ti vin arogan e zot pa ti obei ou bann komannman. Zot ti fer pese kont ou bann regleman ki donn lavi sa enn ki met zot an pratik. Zot ti rebel e arogan; zot ti refize obei ou.

³⁰ Ou ti pasyan avek zot pandan bokou lannen; ou ti averti zot par ou lespri, par lentermedyer ou bann profet. Me zot pa ti ni menm ekoute. Alor, ou ti livre zot dan lanmen bann pep sa bann pei.

³¹ Me, dan ou gran konpasyon, ou pa ti detri zot, ou pa ti abandonn zot, akoz ou en Bondye avek konpasyon ki konn pardonnen.

³² Aprezan, nou Bondye, Bondye ki gran, pwisan e ki merit respe; ou ki gard ou lalyans e montre ou fidelite pran kont sa maler ki'n tap nou, nou bann lerwa, nou bann sef, nou bann pret, nou bann profet, nou bann zanset, ek tou ou pep, depi lepok bann lerwa Asiri, ziska ozordi.

³³ Ou'n azir dapre lazistis dan tou sa ki'n ariv nou; ou'n azir fidelman anver nou, tandis ki nou, nou'n mal azir.

³⁴ Nou bann lerwa, nou bann sef, nou bann pret, e nou bann zanset, pa'n obei ou lalwa. Zot pa'n met an pratik ou bann komannman, ni pran ka avek bann lavertisman ki ou ti donn zot.

³⁵ Pandan ki zot ti dan zot rwayonm, dan byennet ki ou ti'n donn zot, dan sa gran pei fertil ki ou ti'n met devan zot, zot pa ti servi ou e zot pa ti abandonn zot bann move pratik.

³⁶ Ozordi, nou'n vin bann lesklav! Dan sa pei ki ou'n donn nou zanset pour ki zot profite e manz son bann bon fri, nou'n vin lesklav.

³⁷ Tou son kantite prodwi, i pour bann lerwa ki ou'n plas lo nou latet, akoz nou bann pese. Zot domin lo nou ek nou bann troupo e nou dan en gran soufrans!

Lepep I Siny en Lalyans

³⁸ Akoz tousala, nou ti fer en lalyans ki nou ti met par ekri. Non nou bann sef, bann levit, ek bann pret, in ganny enskri lo sa dokiman ki ti ganny sele.