Nehemi 13 - Labib An Kreol Seselwa

Separasyon bann Etranze avek Pep Izrael

¹ En zour, zot ti lir dan liv Moiz devan lepep, ki okenn Amonit, ni okenn Moabit pa pou zanmen antre dan lasanble Bondye,

² akoz zot pa ti anmenn dipen ek delo pour bann Izraelit, e akoz zot ti pey Balaanm pour modi pep Izrael. Me nou Bondye ti tourn sa malediksyon an benediksyon.

³ Kan bann Izraelit ti'n antann lektir lalwa, zot ti sas bann etranze dan zot kominote.

⁴ Avan sa, pret Eliasib ki ti annan responsabilite bann lasal tanp nou Bondye e ki ti fanmir avek Tobiya,

⁵ ti'n prepar en gran lasanm pour Tobiya. Dan sa landrwa, oparavan, zot ti plas bann lofrann vezetal, lansan, bann istansil, ladim dible, diven ek delwil, bann par pour bann levit, bann santer, bann portye, ek kontribisyon pour bann pret.

⁶ Kan tousala ti arive, mon pa ti Zerizalenm, akoz mon ti'n retourn kot lerwa, dan tranndezyenm lannen renny Artakzerzes, lerwa Babilonn. Ver lafen lannen, mon ti demann lerwa permisyon

⁷ pour retourn Zerizalenm. Alor, mon ti dekouver fot ki Eliasib ti'n fer par donn Tobiya en lasal dan bann lakour tanp Bondye.

⁸ Mon ti pran en gran lakoler, e fer zet deor tou sa ki ti pour Tobiya.

⁹ Mon ti donn lord pour pirifye sa lasal, e fer retourn bann istansil tanp Bondye, bann lofrann vezetal ek lansan.

¹⁰ Mon ti osi aprann ki bann levit pa ti'n resevwar zot par; ki bann levit ek bann santer ki ti responsab servis, ti'n sove sakenn dan son plantasyon.

¹¹ Mon ti repros bann zofisye. Mon ti demann zot akoz tanp Bondye in ganny abandonnen? Mon ti rasanble bann levit ek bann santer e fer zot repran zot plas.

¹² Alor, pep Zida antye ti anmenn ladim dible, diven ek delwil dan bann magazen.

¹³ Mon ti donn responsabilite bann magazen, avek pret Selemia, skrib Sadok ek levit Pedaya. Hanann, garson Zakour, garson Natanya ti zot asistan, akoz zot ti annan bon repitasyon koman bann zonm onnet. Zot ti ganny responsabilite pour distribye lofrann avek zot bann frer.

¹⁴ Mon Bondye! Mazin mwan, akoz sa. Pa efas bann bon aksyon ki mon'n fer avek fidelite pour tanp mon Bondye e pour son servis.

Bann Reform pour Zour Saba

¹⁵ Dan sa lepok, mon ti war bann zonm dan Zida pe kraz rezen zour saba, anmenn bann pake legren ki zot ti sarz lo zot bann bourik, ensi ki diven, rezen, fig e toudsort fardo ki zot ti anmenn Zerizalenm zour saba. Mon ti donn zot bann avertisman zour zot ti pe vann zot danre.

¹⁶ Ti osi annan bann Tiryen ki ti pe reste dan lavil, ki ti anmenn pwason ek toudsort marsandiz ki zot ti vann zour saba avek bann zabitan Zida dan Zerizalenm.

¹⁷ Mon ti repros bann personnaz enportan dan Zida. Mon ti demann zot: Ki savedir sa bann move aksyon ki zot pe fer? Zot pe mepriz zour saba.

¹⁸ Konmsa menm ki zot zanset ti azir. Pour sa rezon, nou Bondye in anvoy tou sa bann maler lo nou e lo sa lavil. Zot, zot pe ogmant son lakoler kont Izrael par mepriz son saba.

¹⁹ Apre sa, de ki fernwanr ti konmans fer dan Zerizalenm avan saba, mon ti fer ferm bann laport, e mon ti donn lord ki zot ouver li apre saba. Mon ti plas detrwa mon bann serviter kot bann laport, pour anpes antre okenn gro pake zour saba.

²⁰ Alor, bann marsan ek bann vander toudsort prodwi, ti pas lannwit enn ou de fwa, an deor Zerizalenm.

²¹ Mon ti averti zot: Akoz zot pas lannwit devan miray? Si zot rekonmanse, mon pou servi lafors zot. Depi sa, zot pa ti vin ankor pandan saba.

²² Mon ti osi demann bann levit pour pirifye zot, pour vin vey bann laport pour fer sir ki saba i reste en zour sakre. Pour sa osi, mon Bondye, mazin mwan e protez mwan dan ou gran fidelite!

Regleman kont Maryaz avek Etranze

²³ Dan sa menm lepok, mon ti war bann Zwif ki ti marye avek bann fanm sorti Asdod, Amonn, Moab.

²⁴ Lanmwatye parmi zot bann garson ti koz langaz asdodit e pa ti konn koz lalang bann Zideen. Zot ti koz zis langaz tel ou tel pep etranze.

²⁵ Mon ti repros zot e mon ti modi zot; mon ti bat en bann e aras zot seve; mon ti fer zot pret serman o non Bondye: Zot pa pou donn zot bann fiy avek zot bann garson, ni pran zot bann fiy pour zot garson, ni pour zot.

²⁶ Konmsa menm ki Salomon, lerwa Izrael ti fer pese. Ti napa okenn lerwa parey li parmi tou sa kantite nasyon. Son Bondye ti kontan li, e Bondye ti'n etabli li koman lerwa lo Izrael antye. Sepandan, bann fanm etranze ti osi trenn li dan pese.

²⁷ Alor, nou aprann ki zot komet en si gran krim, en sakrilez anver nou Bondye ler zot marye avek bann fanm etranze?

²⁸ Enn bann garson Yoyada, garson Gran-Pret Eliasib, ti zann Sanbalat en Horonit. Mon ti sas li lwen avek mwan.

²⁹ Mazin zot, mon Bondye, akoz zot in sali saserdos ek lalyans bann pret ek bann levit.

³⁰ Mon ti pirifye zot avek bann etranze e mon ti retabli servis bann pret ek bann levit, sakenn dapre son fonksyon.

³¹ Mon ti osi retabli bann lofrann dibwa, dan lepok fikse, ensi ki bann premye fri. Mazin mwan, mon Bondye e azir dan mon faver!