Nahoum 1 - Labib An Kreol Seselwa

¹ En mesaz kondannasyon konsernan Niniv. Sa liv i dekri vizyon ki Bondye in donn Nahoum ki sorti dan vilaz Elkos.

Lakoler Senyer kont Niniv

² SENYER i en Bondye zalou ki vanze. SENYER i tir vanzans, e i tre ankoler. SENYER i revanz lo son bann ladverser, e gard son lakoler kont son bann lennmi.

³ SENYER i pasyan e son pwisans i gran. SENYER pa zanmen fer en koupab pas pour inosan. I tras son semen atraver gro divan ek tanpet; bann nyaz i koman lapousyer anba son lipye.

⁴ I komann lanmer e lanmer i vin sek; i fer sek tou bann larivyer. Laplenn Basann ek Karmel i deperi; fler Liban i fletri.

⁵ I fer tranble bann montanny, e fer fonn bann kolin. Dan son prezans, later i boulverse, e lemonn antye avek tou son zabitan.

⁶ Lekel ki kapab reziste dan son lakoler? Lekel ki kapab siport lasaler son lakoler? Son rankin i propaze parey dife. Bann ros i fann devan li.

⁷ SENYER i bon, i en labri dan moman detres. I pran swen bann ki met zot konfyans dan li,

⁸ menm kan en gro laroul i balye tou. I pou detri son bann ladverser. I pou pourswiv son bann lennmi dan fernwanr.

Mesaz pour Zida ek Niniv

⁹ Ki konplo ou prepare kont SENYER? I pou detri tou konpletman. Lennmi pa pou lev ankor.

¹⁰ Annefe, zot in vin parey brousay avek pikan ki'n anpaye. Zot in soule avek labwason. Zot pou ganny konpletman brile parey lapay sek.

¹¹ Sa enn ki pe fer konplo kont SENYER, in sorti kot ou. Son bann proze i destrikter.

Bon Nouvel pour Zida

¹² La sa ki SENYER i deklare: Menm si zot for e nonbre, zot pou disparet. Si mon'n fer zot lapenn, mon pa pou fer li ankor.

¹³ Aprezan, mon pou kas sa fardo ki lo ou e mon pou kas bann lasenn ki atas ou.

Lo Size Lerwa Niniv

¹⁴ La sa ki SENYER in ordonnen kont zabitan Niniv: Ou pou nepli annan okenn desandans ki pou port ou non. Mon pou detri sa bann stati an bwa e an fer ki dan ou tanp. Mon pou prepar ou latonm, akoz ou nepli vo nanryen.

¹⁵ Zabitan Zida! Gete! La zot pe vini lo montanny, sa enn ki vin anons bonn nouvel: Zot anons lape. Selebre zot bann lafet, Zida; gard zot bann ve. Destrikter pa pou pas ankor parmi zot. I'n ganny konpletman detri.